चितवनको भरतपुरमा ५५ वर्षीय एक पुरुषको कंकाल फेला

चितवन / चितवनको भरतपुर १३ मा मानव कंकाल फेला परेको छ । भरतपुर १३ पृथ्वीनगरमा उक्त मानव कंकाल फेला परेको शुक्रबार जिल्ला प्रहरी कार्यालय चितवनका प्रवक्ता सूर्य थापाले जानकारी दिए ।
प्रवक्ता थापाका अनुसार उक्त कंकाल कास्की जिल्लाका स्थायी वासिन्दा हाल भरतपुर १३ पृथ्वीनगर बस्दै आएका ५५ वर्षीय वसन्तमणि सुबेदीको हो । उनी सोही स्थानका ऋषीराम न्यौपानेको घरमा बसोबास गर्दै आएका हुन् ।
सुवेदी भदौ २१ गते दक्षिणकाली मध्यवर्ती सामुदायिक वनमा निउरो टिप्न जाने भनी घरबाट हिँडेको बताइएको छ । उनी घर नफर्केपछि भदौ २४ गते आफन्तले प्रहरीमा जाहेरी दिएका हुन् ।
प्रहरीले खोजतलास गर्ने क्रममा सुवेदीले लगाएको हाफ कट्टु, ढाका टोपी, चप्पल सोही सामुदायिक वनमा फेला परेको हो । उनका आफन्तले सनाखत गरेपछि उक्त कंकाल सुवेदीको भएको यकिन गरिएको प्रहरीले जनाएको छ ।
सुवेदीलाई जंगल जनावर खाएको हुन सक्ने प्रहरीको अनुमान छ भने थप अनुसन्धान कार्यवाही भइरहेको प्रहरीले बताएको छ ।