‘सोच सकारात्मक भए जीवन खुशी’ – सामाजिक अभियन्ता अधिकारी

–प्रमिला तामाङ
चितवन । भरतपुर–२, क्षेत्रपुरस्थित सिद्धि विनायक बचत तथा ऋण सहकारी संस्था लि. ले सहकारी प्रशिक्षण तथा खुशी जीवनका लागि सकारात्मक सोच कार्यक्रम सम्पन्न गरेको छ । संस्थामा आवद्ध सदस्यहरुको क्षमता अभिवृद्धि र काम कर्तव्यका विषयमा आइतबार सो कार्यक्रम गरिएको हो ।
मानव सेवा आश्रमका केन्द्रीय अध्यक्ष तथा सामाजिक अभियन्ता रामजी अधिकारीले सकारात्मक सोचले नै खुशी जीवन प्राप्त हुने बताए । आत्म चिन्तन र निस्वार्थपूर्वकको सेवाले नै जीवन खुशी हुने उनको धारणा थियो ।
कार्यक्रमका प्रमुख अतिथि समेत रहेका अधिकारीले मानव जीवन प्राप्ती भए पश्चात गर्नुपर्ने कार्यहरुको बारेमा चर्चा गरेका थिए । विचारको शुद्धिकरणले नै सोचको शुद्धिकरण हुने भएकोले परिवर्तन आफैँबाट सुरु गर्ने बेला आएको उनको भनाइ थियो ।
संस्थाका संस्थापक अध्यक्ष शालिकराम घिमिरेले संचालकहरुको संस्थाप्रतिको दूरदर्शिता नभए असक्षम हुने बताए । उनले संचालक समितिका पदाधिकारीहरुको काम, कर्तव्य र अधिकारको विषयमा प्रशिक्षण दिएका थिए ।
कार्यक्रममा संस्थाका अध्यक्ष थिरप्रसाद धितालले संस्थालाई गति दिन सबैको सोच सकारात्मक हुनुपर्ने बताए । सबैको साथ सहयोग र इमान्दारिताले नै संस्थाको गरिमालाई बचाउन सकिने उनको धारणा थियो । कार्यक्रममा उनले नेपालमा सहकारीको विकासक्रमबारे चर्चा गरेका थिए ।
संस्थाको गलत ढंगको प्रचार प्रसारले दूरगामी असर पर्ने संस्थाका सचिव मुकुन्दप्रसाद गौतमले बताए । संस्थाहितको लागि सबैको भूमिका र जिम्मेवारी उत्तिकै महत्वपूर्ण भएको उनको भनाइ थियो ।
कार्यक्रममा संस्थाका व्यवस्थापक विकास पौडेलले संस्थाको आर्थिक गतिविधिबारे प्रकाश पारेका थिए । उनले संस्थाले हप्ताकै सातै दिन सेवा दिएको अवगत गराउँदै शनिबार १२ बजेसम्म रहने जानकारी दिए ।
कार्यक्रममा संस्थाका निवर्तमान अध्यक्ष पुरुषोत्तम गौतम, कोषाध्यक्ष जयराम पाण्डे, संगीता गौतम, इन्दिरा पन्त, भगवती पाण्डे लगायत ४५ जना प्रशिक्षार्थीहरुको सहभागिता रहेको थियो ।