तीन क्वीन्टल गाँजा बरामद, टिपर चालक फरार

मकवानपुर / मकवानपुर प्रहरीले हेटौंडाको बुद्धचोकबाट ठूलो परिमाणमा लागूऔषध गाँजा बरामद गरेको छ । प्रहरीले शुक्रबार हेटौंडा उपमहानगरपालिका–१० बुद्धचोकबाट ३०५ किलो (तीन क्वीन्टल) लागूऔषध गाँजा बरामद गरेको जिल्ला प्रहरी कार्यालय मकवानपुरका प्रहरी नायव उपरीक्षक टेक बहादुर कार्कीले जानकारी दिए ।
उनका अनुसार, थानाभर्याङबाट बुद्धचोकतर्फ आउँदै गरेको ना ८ ख १७३८ नम्वरको टिपरलाई शंका लागेर चेकजाँच गरिएकोमा उक्त परिमाणको गाँजा बरामद भएको हो । उक्त गाँजा ओसारपसारमा संलग्न टिपर चालक भने फरार रहेका छन् ।
उनको खोजी कार्य गर्नुका साथै प्रहरीले बरामद गरेको तीन क्वीन्टल गाँजा र टिपरलाई नियन्त्रणमा लिई घटनाको बारेमा आवश्यक अनुसन्धान गरिरहेको जनाइएको छ ।