राज्यकै एक निकायले निर्माण स्वीकृति र अर्कोले भत्काउनु लज्जास्पद हो – उवासंघ

चितवन / उद्योग वाणिज्य संघ चितवनले सडक विस्तारको नाममा नारायणगढ बजार क्षेत्रमा अन्धाधुन्द डोजर चलाएकोमा घोर भत्र्सना गरेको छ । संघले शनिबार पे्रस सम्मेलनमार्फत सडक डिभिजन कार्यालयले नारायणगढका नक्सापास एवं निर्माण सम्पन्न प्रमाणपत्र प्राप्त व्यवसायिक भवनमाथि डोजार चलाईएकोमा गम्भीर ध्यानाकर्षण भएको जनाएको हो । अव्यवस्थित रुपमा संरचना भत्काउने कार्य गरेकोमा दुःख व्यक्त गरेको छ ।
प्रेस सम्मेलनमा बोल्दै उवा संघका अध्यक्ष चुननारायण श्रेष्ठले राज्यकै एउटा निकायले भवन निर्माणका स्वीकृति दिने र अर्कोले निर्माण सम्पन्न संरचना भत्काउने कार्य अति नै लज्जास्पद भएको बताएका छन् । अध्यक्ष श्रेष्ठले घरधनी आफैं मापदण्ड विपरितका संरचना भत्काउदै गरेको अवस्थामा नगरको सुन्दरता बिग्रिने र भवनको बाँकी संरचना समेत कमजोर हुने गरी डोजर चलाउन रोक्न माग गरेका छन् ।
मापदण्ड विपरित बनेका संरचना भत्काउने सवालमा उद्यमी व्यवसायीलाई व्यवस्थित हुने समय नदिईएको समेत उनको जिकिर थियो । उनले व्यवसायीलाई व्यवस्थित हुन समय उपलब्ध गराउने बिषयमा सरोकारवालसँग समन्वय गर्ने भनिएकोमा अप्रत्यासित रुपमा संरचना भत्काउने कार्य खेदजनक भएको बताए ।
समय नहुँदा व्यवसायीहरुको सामानमा क्षति पुगेको उनको भनाइ छ भने अव्यवस्थित तरिकाले संरचना भत्काउँदा व्यवसायीको सामान यत्रतत्र छरिएको, बैंक तथा वित्तिय संस्थाका एटिएम मेसिन, लकरमा समेत क्षति पुगेको छ ।
घरको पेटि र टप मात्रै भत्काउने सहमति भए पनि सटर समेत भत्काईएको भन्दै अध्यक्ष श्रेष्ठले खेद प्रकट गरे । कोभिड–१९ ले वित्तिय क्षेत्रमा देखिएको जटिलता र बैंक ब्याजदरमा भएको बृद्धिले थलिएका व्यवसायीहरुलाई थप आतंकित र हतोत्साहित गराएको उनको गुनासो थियो ।
विकासका लागि आवश्यक पूर्वाधारहरु निर्माण दिर्घकालीन र आवश्यक समन्वयमा हुनुपर्छ भन्ने संघको मान्यता रहेको भन्दै पेटिमा मात्र डोजर लगाउने र अन्य संरचनामा क्षति हुने तवरले कार्य नगर्ने आश्वासन दिएर अव्यवस्थित रुपमा संरचना भत्काउनु दुःखद भएको उनको भनाइ थियो ।
भरतपुरको पुल्चोक गोन्द्राङ ६ लेन सडक विस्तारका लागि सडकमा पर्ने अवैध संरचनाहरु भत्काउन थालिएको हो । पुल्चोक गोन्द्राङ सडक विस्तार अन्तर्गत पुल्चोकदेखि केन्द्रीय बस टर्मिनलसम्म ५८ वटा घरको पिल्लर भत्काइनेछ ।