चितवन / लायन्स क्लब अफ नारायणगढ नारायणीको आयोजना र भरतपुर महानगरपालिका वडा नं. १ कार्यालयको सहयोगमा ५० जना महिलाहरुलाई ४ दिने ओभन फ्रि बेकरी तालिमको समापन गरिएको छ ।
महिलाहरुलाई लक्षित गरी दिइएको बेकरी तालिम पुस १९ गते सुरु भई आज (सोमबार) समापन गरिएको लान्यस क्लब अफ नारायणगढ नारायणीका अध्यक्ष रसु पियाले जानकारी दिइन् ।
- ADVERTISEMENT -
कार्यक्रममा भरतपुर महानगरपालिका वडा नं. १ कार्यालयका वडा अध्यक्ष केशव महर्जनले प्रशिक्षार्थीहरुलाई आफूले सिकेको सिपलाई प्रयोगमा ल्याउन आग्रह गरे ।
कार्यक्रमका प्रमुख अतिथि समेत रहेका अध्यक्ष महर्जनले इच्छाशक्ति भएमा जुनसुकै सिपबाट पनि सफलता मिल्ने भनाइ थियो । उनले वडा कार्यालयमा विभिन्न किसिमका तालिमहरु हुने भएकोले प्रपोजलसहित आएमा सहयोग गर्ने प्रतिबद्धता व्यक्त गरे ।
- ADVERTISEMENT -
उनले प्रशिक्षार्थीहरुको उत्साहजनक सहभागिता र लगावको खुलेर प्रशंसा गर्दै आगामी दिनमा सिकेका सिपबाट आत्मनिर्भर बने मात्रै सार्थकता पाउने बताए ।
कार्यक्रमको समापन गर्दै अध्यक्ष पियाले चार दिने बेकरी तालिम प्रभावकारी भएको बताए । उनले महिलाहरुलाई स्वरोजगार र आत्मनिर्भर बनाउने किसिमका तालिमहरु आगामी दिनमा पनि सञ्चालन गर्ने प्रतिबद्धता व्यक्त गरे ।
तालिममा प्रशिक्षकद्वय निलिमा मास्के श्रेष्ठ र लक्ष्मी ओझा भद्राले प्रशिक्षण दिएका थिए । उनीहरुले तालिममा विभिन्न आइटमका केक, कुकिज, पिक्कल बनाउन सिकाएका हुन् ।
कार्यक्रमको संयोजकमा संगीता श्रेष्ठ र सहसंयोजक मन्दिरा जोशी रहेका थिए । वडा अध्यक्ष महर्जन र अध्यक्ष पियाले संयुक्त रुपमा उनीहरुलाई मायाको चिनो र तालिममा सहभागी प्रशिक्षार्थीहरुलाई प्रमाणपत्र दिएका हुन् ।
कार्यक्रममा लायन्स क्लबका एफजेएफ रचना चुके, एफजेएफ दुर्गालक्ष्मी श्रेष्ठ, संस्थापक अध्यक्ष सुधा जोशी, भरतपुर महानगरपालिका वडा नं. का सचिव शिवजी अधिकारी, वडा सदस्य राममाया पिया लगायतको उपस्थिति रहेको थियो ।
