‘कोरोना संक्रमणबाट जनताको जीवनरक्षा पहिलो’ – प्रम ओली

0
89

काठमाडौं / प्रधानमन्त्री केपी शर्मा ओलीले कोरोना रोकथाम र नियन्त्रणका लागि सरकारले चालेका कदमको बचाउ गरेका छन् । संविधान दिवसका अवसरमा शनिबार बिहान सैनिक मञ्च टुँडिखेलमा आयोजित समारोहलाई सम्बोधन गर्दै प्रधानमन्त्री ओलीले कोरोना नियन्त्रणका लागि सरकारले चालेका कदम उराठलाग्दो नभएको बताएका हुन् ।
उनले कोरोना संक्रमण हुनुपूर्व नेपालमा स्वास्थ्य क्षेत्रको पूर्वाधार कमजोर रहेको उल्लेख गर्दै अहिले त्यसमा उल्लेख्य वृद्धि र सुधार गरिएको बताए । सुरुमा एउटा नमुना परीक्षण गर्न ८ हजार ५ सय रुपैयाँसम्म लाग्ने गरेपनि अहिले २ हजार रुपैयाँमा कोरोना परीक्षण हुने उनले बताए ।
उनले सरकारले कोरोना संक्रमणबाट जनताको जीवनरक्षा पहिला भनेर हरसम्भव प्रयास गरेको बताएका छन् । प्रधानमन्त्रीले जनतालाई सचेत बनाउँदै जीवनरक्षाका लागि छिमेकी मुलुकभन्दा पहिला नियन्त्रण, रोकथाम र उपचारका लागि काम गरिएको बताए ।
कोरोना महामारीको अवस्था नआएको भए ठूला आयोजनाहरु पूरा हुनेक्रममा हुने थिए भन्दै प्रधानमन्त्रीले तर पनि विकास आयोजनाका कामहरुलाई निरन्तरता दिइएको बताए । प्रधानमन्त्रीले कोरोना महामारीकाबीच पनि समग्र आर्थिक सूचकहरु नकारात्मक नभएको दाबी गरे ।