काठमाडौँ / पृथ्वी राजमार्ग अन्तर्गत धादिङको गजुरी गाउँपालिका–३ स्थित परेवाटारमा सडक भासिएपछि यातायात सेवा पूर्ण रूपमा अवरुद्ध भएको छ ।
त्रिशूली नदीमा आएको भीषण बाढीका कारण सडकको तल्लो भाग (बेस) निरन्तर कटान हुँदा आइतबारदेखि सडक भासिन थालेको धादिङ प्रहरीले जनाएको छ । कटान तीव्र बनेपछि जोखिम बढेकाले दुवैतर्फ सवारी साधन सञ्चालनमा रोक लगाइएको छ ।
- ADVERTISEMENT -
यसअघि पनि सोही राजमार्गको कृष्णभीरमा त्रिशूलीको बाढीले सडक कटान गरी भासिएपछि यातायात सेवा ठप्प बनेको थियो ।
पृथ्वी राजमार्ग अबरुद्ध भएपछि संघीय राजधानी काठमाडौँ भित्रिने र बाहिरिने सवारी साधनहरूका लागि वैकल्पिक मार्गको प्रयोग भइरहेको छ। हाल चितवनको नारायणगढ हुँदै हेटौँडा(काठमाडौँ जोड्ने तीनवटा वैकल्पिक रुटमार्फत गाडीहरू सञ्चालन भइरहेका छन् ।
