‘यात्रा ग्रुप’को कोरोनाबारे सचेतना कार्यक्रम

भरतपुर । यात्रा ग्रुपको आयोजनामा वरिष्ठ फिजिसियन डा. भोजराज अधिकारीले फेसबुक मार्फत् प्रत्यक्ष प्रसारण गरेको छ । डा अधिकारीले प्रसारणमा हामी संक्रमणको महामारीमा भएकोले सचेत हुन जरुरी भएको बताएका छन् । ह्याच्छ्यु गर्दा होसियार हुनुपर्ने, आफ्नो कपडा तथा रुमाललाई उचित व्यवस्थापन गर्नुपर्ने, सर्जिकल माक्स लगाउनाले केही सुरक्षित हुने उनको भनाइ छ ।
प्रसारणमा राष्ट्रियस्तरको समस्या हुन नदिन मुख्य रुपमा राज्यले लिनुपर्ने नीति भएको डा अधिकारीले बताएका छन् । कोरोनाबाट पूर्ण सुरक्षाका लागि राज्यले जिम्मा लिनुपर्ने प्रसारणमा बताइएको छ भने रोग लागि हालेमा टेष्ट तथा पूर्ण रुपमा उपचार राज्यले गर्नु पर्ने उनको भनाइ छ ।
कोरोनाबारे जानकारी दिने उद्देश्यले उक्त सचेतना कार्यक्रम गरिएको गु्रपका अध्यक्ष कृष्ण कार्कीले बताए । विश्वभरि महामारीको रुप लिएको कोरोनासम्बन्धी सानै कार्यक्रम भएपनि संचालन गरियो भने आम जनतालाई सजग गराउन सकिने कार्कीको भनाइ छ । भरतपुर अस्पतालमा कोरोना संक्रमण उपचारको लागि १९ वेडको आईसोलेसन वार्ड निर्माण गरिएको अध्यक्ष कार्कीले बताए ।
विश्व स्वास्थ्य संगठनले नेपाल पनि कोरोनाको उच्च जोखिम रहेको बताएपछि नेपालमा पनि विभिन्न संघ संस्थाहरुले सचेतना कार्यक्रम सञ्चालन गर्दै आइरहेको छ । नेपालको तेस्रो पर्यटकीय क्षेत्र सौराहा चितवनमा रहेकोले पनि चितवनमा विशेष रुपमा हेरिएको छ ।