चितवनमा चैत २ गतेदेखि दादुरा-रुबेला खोप अभियान

भरतपुर । जिल्ला खोप समन्वय समिति चितवनले दादुरा–रुबेला खोप अभियान संचालन गर्ने भएको छ । स्वास्थ्य कार्यालय चितवनका प्रमुख दिपकप्रसाद तिवारीका अनुसार चैत्र २ गतेदेखि थालिने उक्त अभियानमा ९ महिनादेखि ५ वर्षमुनिका बालबालिकाहरुलाई दादुरा–रुबेला खोप लगाइने भएको हो ।
उक्त अभियान अन्तर्गत पहिलो चरणमा भरतपुर महानगरपालिका, रत्ननगर नगरपालिका, कालिका नगरपालिका, माडी नगरपालिका, इच्छाकामना गाउँपालिकामा दादुरा–रुबेलाको खोप लगाइने छ । उक्त खोप संचालन चैत २ गतेदेखि ७ गतेसम्म हुनेछ ।
त्यसैगरी दोश्रो चरणको खोप खैरहनी नगरपालिकामा चैत १० देखि १४ गतेसम्म लगाइने छ भने राप्ती नगरपालिकामा चैत १० देखि १८ गतेसम्म हुने अधिकारीले बताए ।
दुई चरण गरी ५८ हजार नौ सय ८३ बालबालिकालाई खोप लगाइने लक्ष्य रहेको छ भने ५ सय ६८ खोप केन्द्रहरु संचालन हुने उनले जानकारी दिए । त्यस्तै १३२ जना खोप कार्यकर्ताहरु परिचालित हुने खोप अभियानमा ११३६ स्वयम्सेवक रहने उनको भनाइ थियो ।
उक्त अभियानमा खोप कार्डको व्यवस्था गरिने भएको छ भने बालबालिकाका अभिभावकहरुलाई यस पटकबाट निमन्त्रणा कार्ड नै दिइने छ भने खोप लगाएका सबैलाई प्रमाण पत्र दिने भएको छ । उक्त कार्डबाट बालबालिकालाई खोप लगाएको प्रमाणित गरिने उनको भनाइ थियो ।
चितवनमा सन् २०१७-१८ मा दादुरा नदेखिएको, २०१९ मा १९ जनामा देखिएको थियो भने २०२० मा ४ जना दादुरा भेटिएको उनले बताए ।
उक्त कार्यक्रममा भरतपुर अस्पतालका वरिष्ठ बालरोग विशेषज्ञ डा युवानिधि बसौलाले चितवनमा दादुरा फाट्टफुट्ट देखिए पनि रुबेला भने नदेखिएको जानकारी दिए । पहिलो पटक खोप लगाएको बालबालिकाहरुमा दादुरा पाइए पनि दोस्रो पटक खोप लगाएपछि त्यसलाई निर्मुल पार्न सकिने उनको भनाइ थियो ।