टाँडीचोकमा आकाशे पुल निर्माण सुरु

रत्ननगर/चितवन । रत्ननगर नगरपालिकाले टाँडी चोकमा आकाशे पुल निर्माण सुरु गरेको छ । पूर्व पश्चिम राजमार्ग अन्तर्गत पर्ने टाँडीचोकमा २ करोड ४२ लाख ४ हजार ५३३ रुपैयाँको लगानीमा निर्माण सम्पन्न हुने रत्ननगर नगरप्रमुख नारायण वनले जानकारी दिए ।
उक्त आकाशे पुलको शिलान्यास नगर प्रमुख नारायण वन र उपप्रमुख विमला दुवाडीले संयुक्त रुपमा गरेका थिए ।
गत फागुन महिनामा सम्झौता गरिएको उक्त आकाशे पुलको लकडाउनको मौका छोपेर निर्माण कार्य सुरु गरिएको नगरप्रमुख वनले जानकारी दिए ।
प्रदेश सरकारको एक करोड र नगरपालिकाले चालु आर्थिक वर्षमा विनियोजन गरेको एक करोड ४२ लाखको लगानीमा आकाशे पुल निर्माण हुने इन्जिनियर पंकज गिरीले जानकारी दिए । सरकारले आन्तरिक जनशक्ति र श्रोतको परिचालन गरी निर्माणको काम गर्न दिने घोषणा गरेपछि सो नगरपालिकाले आकाशे पुल निर्माण सुरु गरेको हो ।
आकाशे पुल निर्माणको लागि २०७६ फागुन २ गते सम्झौता गरिएको र २०७७ असार २४ गते भित्र सम्पन्न गर्नुपर्ने बताइएको छ । आकाशे पुल चालु आर्थिक वर्षको महत्वपूर्ण आयोजना भएको र निर्धारित समयमै निर्माण सम्पन्न गर्ने योजना रहेको नगर प्रमुख वनको भनाइ छ ।