लकडाउन उल्लघंनको कारवाहीमा २ सय ३६ सवारी साधन

भरतपुर । नेपाल सरकारले नेपालभर लकडाउन आह्वान गरेको शुक्रबार १८औं दिन भएको छ । विश्वव्यापी रुपमा बढ्दै गएको कोरोना भाइरस नियन्त्रणका लागि सरकारले उक्त लकडाउन गरेको हो ।
कोरोना भाइरस नियन्त्रणका लागि सरकारले गरेको लकडाउन उल्लघंन गर्ने २ सय ३६ सवारीसाधनलाई शुक्रबार कारवाही गरिएको छ ।
कारवाहीमा १२२ मोटरसाइकल, २५ स्कुटी, २ अटो, १ वटा माइक्रो र ८६ वटा मोटरसाइकलको चावी लिएर कारवाही गरिएको जिल्ला प्रहरी कार्यालय चितवनका डिएसपी एकनारायण कोइरालाले बताए ।
डिएसपी कोइरालाका अनुसार विभिन्न स्थानमा नियन्त्रणमा लिइएका सवारीसाधनलाई होल्ड राखी छाडिएको बताए । यसअघि पनि विभिन्न सवारी साधनलगायत मानिसहरुलाई कारवाही गरिएको थियो ।
नियन्त्रणमा लिइएका आवश्यक छानविन पश्चात सम्झाईबुझाई अति आवश्यक कामबाहेक लकडाउन अवधिभरि घर बाहिर नहिँड्ने शर्तमा छाडिएको डिएसपी कोइरालाको भनाइ थियो ।
त्यस्तै कोरोना भाइरस न्यूनीकरणका लागि भन्दै अति आवश्यकीय खाद्य वस्तु बिक्री वितरणको लागि बिहान ८ः०० बजेदेखि बेलुका ५ बजेसम्म मात्र खुल्ला गर्न प्रशासनले आग्रह गर्दै आएको छ ।