गाउँपालिकाका अध्यक्षद्वारा कोरोना भाइरसबारे सचेतना

देवघाट । विश्वव्यापी रुपमा फैलिरहेको कोरोना भाइरस नेपालमा पनि यसको संक्रमण देखिन थालेपछि देवघाट गाउँपालिका अध्यक्ष दुर्गाबहादुर थापामगरले देवघाट वडा नम्बर दुई र वडा नम्बर तीनको बस्ती–बस्तीमा पुगेर सचेतनामूलक सन्देश दिएका छन् । अध्यक्ष थापामगरले कोरोना भाइरस सम्बन्धी सन्देशलगायत त्यहाँका स्थानीयहरुलाई साबुन वितरणलगायत बेलाबेलामा मिचीमिची हात धुन आग्रह गरेका छन् ।
कोरोना भाइरसबाट आफू र आफ्नो समुदायलाई सुरक्षित राख्न सो अभियान थालिएको अध्यक्ष मगरको भनाइ थियो । गर्मीयाम बढेसंँगै अन्य रोगको व्याक्टेरिया, भाइरस फैलिन नदिन र कोरोनाको जोखिम कम गर्नको लागि पनि मिची मिची साबुन पानीले हात धुन सुझाव दिए । पशु पन्छीका खोरहरुमा थप सरसफाईमा ध्यान दिनको लागि कृषकहरुलाई उनले अनुरोध गरेका छन् । साथै कोरोनाको संक्रमणबाट जोगिन व्यक्तिगत सरससफाईमा पनि विशेष ध्यान दिनु पर्ने र अहिले सरकारले लागु गरेको लकडाउन समय अवधिभर सबैलाई घरमै बस्न आग्रह समेत उनले गरे ।
देवघाट गाउँपालिका कार्यालयले यसअघि पनि हातधुने कार्यक्रम विभिन्न ठाँउहरुमा गर्दै आएको र अहिले पनि हातधुनका लागि ठाउँठाउँमा वाल्टिनसहितको सावुनपानीको व्यवस्था गरिएको छ ।
कोरोनाबाट बच्न जनचेतनामूलक सन्देश पनि प्रवाह गरिरहेको देवघाट गाउँपालिका कार्यालयका प्रमुख प्रशासकीय अधिकृत रमेश सुवेदीले जानकारी दिए । कार्यक्रम देवघाट गाउँपालिकाका कृष्ण पन्तको संयोजकत्वमा सम्पन्न भएको थियोे ।