नेपालमा थप ३ सहित १२ कोरोना संक्रमित भेटिए. विश्वभर कोरोना संक्रमित १८ लाख नजिक

काठमाडौं । नेपालमा आइतबार थप तीन जनामा कोरोना सक्रमण देखिएको पुष्टि भएको छ । वीरगञ्जमा उपचाररत तीन जनामा कोरोनाको पुष्टि भएको स्वास्थ्य मन्त्रालय स्रोतको भनाइ छ ।
कोरोना संक्रमण ७ औं दिनसम्म नदेखिए पनि आठौं दिनमा नयाँ तीन व्यक्तिमा संक्रमणको पुष्टि भएको हो । योसँगै नेपालमा संक्रमितको संख्या १२ पुगेको छ । संक्रमितहरु धर्मगुरु रहेको बुझिएको छ । तीनै जना भारतीय नागरिक रहेको बताइएको छ । उनीहरु मध्ये २ जना उत्तर प्रदेशका र एक जना दिल्लीका भएको मन्त्रालय स्रोतले बताएको छ ।
हेटौंडामा परीक्षण गरिएको तीन वटा नमुनामा पोजेटिभ देखिएपछि थप परीक्षणका लागि राष्ट्रिय जनस्वास्थ्य प्रयोगशाला पठाइएकोमा रिपोर्ट पोजेटिभ आएको हो । हेटौंडा–१० स्थित किटजन्य रोग अनुसन्धान तालिम केन्द्रमा शुक्रबार ३५ जनाको कोरोना परीक्षण गरिएको थियो ।
त्यसमध्ये तीन जनाको नतिजा भने पोजेटिभ हो वा होइन भन्ने छुट्याउन नसकेपछि थप पुष्टिका लागि नमुनालाई काठमाडौं टेकु स्थित राष्ट्रिय जनस्वास्थ्य प्रयोगशालामा पठाइएको थियो । काठमाण्डौमा परिक्षण पछि पनि उहाँहरुलाई कोरोना पोजेटिभ भएको पुष्टि भएको हो ।
यसअघि संक्रमण देखिएका ९ जनामध्ये १ जना उपचारपछि घर फर्किएका छन् भने ८ जना विभिन्न अस्पतालमा उपचाररत छन् ।
विश्वव्यापी महामारीको रुप लिइरहेको कोरोना भाइरसले विश्वरभर १७ लाख ८४ हजार ३ सय ३५ जना संक्रमित भएको विश्व स्वास्थ्य संगठन (डब्लुएचओ)ले जनाएको छ । त्यसैगरी कुल मृत्यु १ लाख ९ नौ हजार ६२ जनाको मृत्यु भएको छ भने ४ लाख ५ हजार ४३ जना निको भई घर फर्केका छन् ।
कोरोना भाइरसका कारण सबैभन्दा बढी अमेरिका प्रभावित भएका छन् । कोरोनाबाट अमेरिकामा ५ लाख ३३ हजार १ सय १५ जना संक्रमण भएका छन् । संक्रमणबाट २० हजार ५ सय ८० जनाको मृत्यु भएको छ भने ३० हजार ५ सय २ जना उपचार पछि निको भएका छन् ।
यसैगरी दोस्रो प्रभावित देश स्पेन रहेको छ । संक्रमित १ लाख ६३ हजार २७ जना र मृत्यु १६ हजार ६ सय ६ जना रहेको छ । कोरोनामुक्त घर फर्केका ५९ हजार १ सय १ जना रहेका छन् । इटालीमा १ लाख ५२ हजार २ सय ७१ जनालाई संक्रमण भएको छ । कोरोनाबाट १९ हजार ४ सय ६८ जनाको ज्यान गएको छ भने ३२ हजार ५ सय ३४ जना निको भई घर फर्केका छन् ।