गाडी दुर्घटनामा १२ जनाको मृत्यु

नेपालगञ्ज । नेपालगञ्जको बाँकेमा आइतबार राति गाडी दुर्घटना भएको छ । पूर्व–पश्चिम राजमार्ग अन्तर्गत बाँकेको ठुरिया जंगलमा रोकिराखेको बा ४ ख ९०६४ नम्बरको ट्रकमा ठोक्किँदा दुर्घटना भएको हो ।
उक्त दुर्घटनामा १२ जनाको मृत्यु भएको छ । दुर्घटनामा ११ जनाको घटनास्थलमै ज्यान गएको थियो भने एकजनाको उपचारको क्रममा मृत्यु भएको भेरी अस्पतालले जनाएको छ ।
अस्पतालका मेडिकल सुपरीटेन्डेन्ट डा. प्रकाश थापाका अनुसार एघार पुरुष र एक महिलाको मृत्यु भएको बताइएको छ ।
दुर्घटनामा घाइते २० जना पुरुष र एक महिलाको भेरी अस्पतालमै उपचार भइरहेको छ । घाइते मध्ये तीनजनाको अवस्था गम्भीर रहेको छ । दुर्घटनामा परेकाहरु भारतका विभिन्न शहरबाट आएका थिए ।
नेपालगञ्ज नाकाबाट उद्धार गरेर उनीहरुलाई सल्यान पठाईँदै थियो । ना ५ ख ५९९५ नम्बरको हाइस गाडीमा ३३ जना सल्यानतर्फ जाँदै थिए ।