आँबुखैरेनी / तनहुँको आँबुखैरेनी गाउँपालिकामा आज सोमबारदेखि लागु हुने गरी भदौ ७ गतेसम्म लकडाउन सुरु भएको छ । गाउँपालिकाको आइतबार बसेको कार्यपालिकाको बैठकले आज भदौ १ गतेदेखि लागु हुने गरी १ हप्ता लकडाउन गर्ने निर्णय गरेको हो ।
आँबुखैरेनी गाउँपालिकामा भन्दा पनि छिमेकी जिल्ला तथा गाउँ/नगरपालिकाहरुमा कोरोना संक्रमणको अवस्था भयावह बन्दै गएकोले त्यस क्षेत्रका सर्वसाधारणहरुको मुख्य बजार आँबुखैरेनी भएकोले संक्रमण फैलने खतरालाई मध्यनजर गर्दै बन्दाबन्दीको निर्णय गर्नुपरेको गाउँपालिकाले जनाएको छ ।
गाउँपालिका अध्यक्ष गिरबहादुर थापाले दिएको जानकारी अनुसार हालसम्म आँबुखैरेनी गाउँपालिकामा २ सय ९१ जनाको पिसिआर परीक्षण गर्दा ६ जनाको मात्र कोरोना पोजेटिभ आएको र त्यस मध्ये ५ जना निको भै घर गैसकेको छ भने बाँकी १ जना आईसोलेसनमा रहेको छ ।
विभिन्न समयमा गरी ७८ जना आशंका गरिएका व्यक्तिहरुलाई क्वारेन्टाईनमा राखेको भएपनि हाल ३ जना मात्र क्वारेन्टाईनमा राखिएको अध्यक्ष थापाले बताए ।
- ADVERTISEMENT -
