कोरोना नतिजा अब मोबाइलमा : भरतपुर अस्पताल

चितवन / भरतपुर कोभिड–१९ परीक्षण प्रयोगशालाले कोरोना परीक्षणको नतिजा मोबाइलबाटै पठाउने भएको छ । प्रयोगशालामा सफ्टवेयर जडान गरी परीक्षणको काम भइसकेकाले सम्भवत आज बिहीबारबाट मोबाइलमा नै नतिजा पठाइने भरतपुर अस्पतालका प्रमुख मेडिकल सुपरिटेण्डेन्ट डा. श्रीराम तिवारीले जानकारी दिनुभयो ।
मेसु डा तिवारीका अनुसार आजदेखि कोरोना परीक्षणको नमुना दिएर नतिजा पर्खिरहेकाहरुलाई म्यासेजमा नतिजा पठाइने र म्यासेज खोल्दा नेगेटिभ र पोजेटिभ देखिने भएको छ भने पासओड राखेर डाउनलोड गरेपछि विस्तृत विवरण हेर्न र प्रिन्ट गर्न सकिने छ ।
हाल अस्पतालले नेगेटिभ आएकाको नाम फेसबुक मार्फत सार्वजनिक गर्ने गरेको छ भने पोजेटिभ आएकालाई टेलिफोन मार्फत जानकारी दिने गरिएको छ ।
प्रयोगशालाका प्रमुख डा. नितु अधिकारीले नमूना दिने सम्बन्धित व्यक्तिले आफ्नो यथार्थ विवरण, नाम, ठेगाना, उमेर र मोबाइल नम्बर दिन अनुरोध गर्नु भएको छ । डा अधिकारीले नम्बर प्रष्ट नभएमा नतिजा अन्यत्र जाने भएकाले सबैलाई ध्यान दिन आग्रह गर्नुभएको हो ।
प्रयोगशाला गएको चैत्र २१ गतेबाट संञ्चालनमा आएको हो । प्रयोगशालामा स्वचालित प्रणालीबाट संञ्चालन गर्न सकिने उपकरण जडानको तयारी भइरहेको उहाँले जानकारी गराउनु भयो । हालसम्म २१ हजारभन्दा बढी नमुना परिक्षण गरी सकिएको छ । जसमध्ये १६ हजार चितवनको रहेका छन् ।