चिकित्सकद्वारा बिरामीमाथि यौन दूर्व्यवहार

चितवन / चितवन मेडिकल कलेजमा बिरामीमाथी एक चिकित्सकले यौन दूर्व्यवहार गरेको घटना बाहिर आएको छ । घाँटीमा समस्या भएपछि मंगलबार अस्पताल पुगेकी १९ वर्षीया युवतीलाई अडियोलोजिस्ट जयलालप्रसाद यादवले आफ्नो काखमा राखेर पटक–पटक गोप्य अंगमा चिमोटेको पीडितको आरोप छ ।
चिकित्सकले मसाज गर्ने भन्दै यौनाङ्गमा पटक–पटक हात पुर्याएको पीडित युवतीको आरोप छ । मंगलबारनै ती युवतीले अस्पताल प्रशासनलाई आँफूमाथि यौन दूर्व्यवहार भएको जानकारी गराएकी थिइन् ।
अस्पतालले बुधबार बिहान पीडित पक्षसँगको छलफलका क्रममा चिकित्सक यादवले माफी मागेका छन् । तर, पीडित पक्षलाई यो घटना बाहिर ल्याए युवतीकै बदनाम हुने भन्दै धम्क्याउने काम गरिएको वार्तामा पुगेका एक ब्यक्तिले जानकारी दिए ।
यस विषयमा अस्पताल प्रशासनले अध्ययन गरिरहेको बताएको छ । –केदार शर्मा, न्युज २४