९५० थान कुर्ता सुरुवालसहित २ पक्राउ

चितवन / प्रहरीले भन्सार छलेर ल्याएको कपडासहित दुई जनालाई पक्राउ गरेको छ । भन्सार नतिरी ल्याएको कपडा र २ जनालाई आइतबार बिहान साढे ४ बजे शहीदचोकबाट पक्राउ गरेको जिल्ला प्रहरी कार्यालय चितवनका प्रवक्ता सूर्यबहादुर थापाले जानकारी दिए ।
प्रवक्ता थापाका अनुसार चेकजाँचको क्रममा भरतपुर–३ शहिदचोकमा रोकिराखेको लु. २ ख. ३४० नम्बर ट्रकको उक्त कपडा परेको हो । करिब ४ लाख ७५ हजार बराबरको लत्ता कपडाको १० पोका फेला पारेको उनले बताए । उनीहरुबाट ९ सय ५० थान कुर्ता सलवारसहितका पोका प्रहरीले बरामद गरेको छ ।
पक्राउ पर्नेमा ट्रक चालक नवलपरासी पश्चिम सरावल गाउँपालिका वडा नम्बर ३ का रामबहादुर चौधरी र मिना केसीलाई नियन्त्रणमा लिएर कारवाहीका लागि वीरगञ्ज भन्सार कार्यालय पठाइएको प्रहरी प्रवक्ता थापाले बताए ।