दोस्रो चरणको लकडाउनले पेरिसमा सात सय किलोमिटर ट्राफिक जाम !

एजेन्सी / कोरोना भाइरस (कोभिड–१९) रोकथाम तथा नियन्त्रणका लागि भन्दै फ्रान्सले दोस्रो चरणको लकडाउनको घोषणा गरेको छ । फ्रान्सले दोस्रो चरणको लकडाउनको घोषणा गरे लगत्तै राजधानी पेरिस छाड्नेको संख्या बढेको हो ।
लकडाउन घोषणापछि पेरिस छोड्नेको लर्को बढ्दा लामो ट्राफिक जाम भएको अन्तर्राष्ट्रिय सञ्चार माध्यमले जनाएका छन् । शुक्रबारदेखि लकडाउन कार्यान्वयनमा आउने भएपछि राजधानीमा बसिरहेकाले शहर छोड्दा ७ सय किलोमिटरसम्म लामो ट्राफिक जाम भएको बीबीसीले जनाएको छ ।
कोरोना भाइरसको संक्रमण रोकथाम तथा नियन्त्रणको लागि शुक्रबार रातिदेखि फ्रान्समा दोस्रो चरणको लकडाउन सुरु हुने भएपछि शहर छाड्नेको संख्या बढेको हो । फ्रान्समा पछिल्लो दिनयता कोरोना संक्रमितसँगै ज्यान गुमाउनेको दर बढ्दै गएको छ । त्यहाँ हिजोमात्रै साढे ४७ हजारभन्दा धरैमा संक्रमण पुष्टि भएको र २ सय ५० जनाको ज्यान गएको बीबीसीले जनाएको छ ।
दोस्रो चरणको लकडाउन लागु भएसँगै फ्रान्सका स्थानीयले अति आवश्यक नपरी घरबाहिर निस्कन पाउने छैनन् ।