हरिमायाले फिर्ता गरिन् छुटेको व्याग र गहना

मकवानपुर / हराएको सामान भेट्न गाह्रो छ । तर समाजमा यस्ता पनि मानिसहरु अझै पनि भेटिन्छन् जसले अरुको सामान जस्ताको त्यस्तै फिर्ता गर्ने गरेको पाइन्छ । त्यस्ता व्यक्तित्वहरु समाजका दर्पण हुन् जो उदाहरण बनेर समाज हितका लागि एक कदम भए पनि अघि सारेका हुन्छन् ।
यस्तै एक अटो चालक हरिमाया देउलाले आफ्नो अटोमा छुटेको एक महिलाको सामान फिर्ता गरेकी छिन् । हेटौंडा–८, कमानेकी चन्द्रकला तिमल्सिनाले कमानेबाट हेटौंडा–२, संगमचोक आउने क्रममा अटोमा सामान छुटाएकी थिईन् ।
वडा प्रहरी कार्यालय हेटौंडाका अनुसार अटो चालक देउलाले तिमल्सिनाले छुटाएकी व्याग र व्यागमा रहेको पोतेसहितको तिलहरी एक थान, कानमा लगाउने झुम्का एक जोर, सिम नभएको सामसुङ मोबाइल एक थान, पावरवाला चस्मा एक थान र चावीको झुप्पा एक थान फिर्ता गरेकी हुन् ।
चन्द्रकलाले आइतबार व्याग हराएको भनी प्रहरीमा उजुरी दिएपछि खोजतलास गर्ने क्रममा हरिमायाले व्याग फिर्ता गरेको बताइएको छ ।