राप्तीका होटलहरुबाट ६ बालबालिकाको उद्धार

चितवन / राप्ती नगरपालिका वडा नं १ का विभिन्न होटलहरुमा बालश्रममा लगाइएका ६ बालबालिकाको उद्धार गरिएको छ । लोथर र पिप्लेका लोकप्रिय होटल, सोनु होटल र काइलीन होटलबाट ती बालबालिकाको उद्धार गरिएको इलाका प्रहरी कार्यालय मनहरिले जनाएको छ ।
राक्सिराङ गाउपालिका वडा नं ९ घर भएका ४ बालिका र २ बालकलाई मंगलबार इलाका प्रहरी कार्यालय मनहरिको टोली, जनप्रतिनिधि तथा युवाहरुको सक्रियतामा उद्धार गरिएको हो ।
१३ देखि १५ वर्षका बालबालिकालाई बिभिन्न प्रलोभनमा पारेर काममा लगाइएको पाइएको प्रहरीले जनाएको छ । बालबालिकालाई ललाइफकाई काममा लैजाने एकजनालाई सोधपुछका लागि नियन्त्रणमा समेत लिइएको छ ।
राक्सिराङ–९, खैराङका मन्जिल चेपाङलाई नियन्त्रणमा लिइ थप अनुसन्धान भइरहेको इलाका प्रहरी कार्यालय मनहरिका प्रहरी निरीक्षक बिनोद श्रेष्ठले जानकारी दिए । १६ वर्षभन्दा कम उमेरका बालबालिकालाई श्रममा लगाउन नेपालको कानुनले बर्जित गरेको छ ।