मेयर वनद्वारा बुद्धको मूर्ति अनावरण

रत्ननगर / रत्ननगर नगरपालिका कार्यालयका मेयर नारायण वनले बुद्धको मूर्ति अनावरण गरेका छन् । मेयर वनले रत्ननगर नगरपालिका वडा नं ३, लौरीघोलाचोकमा स्थापित बुद्धको मुर्ति विहीवार अनावरण गरेका हुन् ।
उक्त बुद्धको मूर्ति कृष्णबहादुर तामाङ ब्लोनले बुवा बलबहादुर ब्लोन र आमा कान्छीमाया ब्लोनको स्मृतिमा स्थापना गरेका हुन् ।
मेयर वनले बुवा आमाको सम्मानमा गरेको कामले नगर विकासमा इट्टा थप्ने काम गरेको बताए । उनले ऐतिहासिक महत्व बोकेको रत्ननगरको लौरीघोललाई पर्यटकीय स्थलको रुपमा विकास गरी सौराहा आएका पर्यटकलाई भित्र्याउने योजना रहेको बताए ।
विश्व उद्धार बौद्ध गुम्बाका अध्यक्ष समेत रहेका ब्लोनले समाजको विकासमा योगदान गरेका वडाभित्रका ११ जना बृद्धबृद्धाहरुलाई नगदसहित सम्मान गरेका थिए । सो अवसरमा ब्लोनले युगौंयुगसम्म बुवाआमाको योगदानलाई बचाई राख्न र समाजप्रतिको उत्तरदायित्व उजागर गर्न आफूले बुद्धको मुर्ति स्थापना गरेको बताए ।
सो अवसरमा उपमेयर विमला दुवाडी, वडाध्यक्षहरु तिलकराज शर्मा पौडेल, गुप्तनाथ भट्टराई, नेपाली काँग्रेसका नेता उत्तम आचार्य, अनेरास्ववियुका केन्द्रीय सदस्य सरोजध्वज भण्डारी लगायतले मन्तव्य राखेका थिए । कार्यक्रम ब्लोनकी कान्छीआमा ठुलीमाया तामाङको अध्यक्षतामा कार्यक्रम सम्पन्न भएको थियो भने सुजन तामाङ ब्लोनले सञ्चालन गरेका थिए ।