सूचनाको स्रोतलाई विश्वसनीय, मर्यादित बनाउन पत्रकारको भूमिका मुख्य : सूचनामन्त्री गुरुङ

चितवन / मिडिया एक्सन नेपाल र नेपालस्थित अमेरिकी दूतावासको सहकार्यमा ‘भ्रामक तथा गलत सूचनाको पहिचान तथा रोकथाम’ विषयक तालिम समापन भएको छ । भर्चुअल माध्यमबाट सुरु भएको दुई चरणको तालिमको आज मंगलबार समापन गरिएको हो ।
कार्यक्रममा संचार तथा सूचना प्रविधि मन्त्री पार्वत गुरुङले सही सूचना, गुणस्तरीय समाचार, सही मार्ग निर्देशन दिन पत्रकारको भूमिका अपरिहार्य रहेको बताए । सभ्य समाजको निर्माण, समृद्धशाली नेपालको समाचार लेखनमा उत्प्रेरित भई सबैलाई जागरुक बनाउन उनले आग्रह गरे ।
उनले सूचनाको स्रोतलाई विश्वसनीय बनाउनेमा पत्रकारको मुख्य भूमिका रहेको बताए भने सकारात्मक सोचबाट मर्यादित पत्रकारिता गर्न सुझाव दिए । भ्रामक समाचारलाई न्यूनीकरण गर्न, समाज रुपान्तरणको लागि सुरुवातदेखि अन्त्यसम्म सदैव चनाखो हुनुपर्नेमा उनले जोड दिए ।
त्यस्तैगरी नेपाल पत्रकार महासंघका अध्यक्ष गोविन्द आचार्यले पत्रकारले सदैव सामाजिक उत्तरदायित्व वहन गर्नुपर्ने र राज्यका निकायहरु लगायत जुनसुकै किसिमको सत्यतथ्य समाचार पाठकहरुसम्म ल्याउने भूमिका निर्वाह गर्नुपर्ने बताए ।
उनले पाठकका विश्वासका लागि हामीले हाम्रो कमी कमजोरीहरुलाई केलाउँदै लानु पर्ने तथा आफू सचेत बन्नुपर्ने उनले बताए । आचारसंहिता पालना नगर्ने पत्रकारहरुलाई विधानबाट निष्काशन गर्नुपर्ने उनले भने ।
नेपालका लागि अमेरिकी राजदूत ¥यान्डी बेरीले ‘भ्रामक तथा गलत सूचनाको पहिचान तथा रोकथाम’ तालिम अर्थपूर्ण भएको बताए । नेपाली पत्रकारहरुले जिम्मेवार पत्रिकाको मूल्य बुझेको र प्रश्न गर्ने मामिलामा उनीहरुमा कुनै हिच्किचाहट नरहेको पाएको उनको अनुभव थियो । गलत र भ्रामक समाचारले जनतालाई मिसलिड गर्ने बताउँदै उनले तथ्यगत समाचार सम्प्रेषण गर्दै जिम्मेवार पत्रकारिताको अभ्यास गर्नुपर्ने उनले भने ।
यस्तै प्रेस काउन्सिलका बोर्ड मेम्बर संगीता खड्काले पत्रकारहरु सबै हातेमालो गरेर जिम्मेवार भई अघि बढ्नुपर्ने बताए । पत्रकारिता गर्दा कर्तव्यनिष्ट भई सबैले आचारसंहिताको पालना गर्नुपर्ने उनले बताए ।
समापन कार्यक्रममा मडिया नेपाल एक्सन नेपालका अध्यक्ष लक्ष्मणदत्त पन्त, मिडिया एक्सन बागमती प्रदेशका संयोजक मधुसुदन दवाडी लगायतले प्रशिक्षण दिएका थिए भने १६ जना पत्रकार सहित २२ जनाको सहभागिता रहेको थियो । मिडिया एक्सन नेपालले विगत ५ वर्षदेखि विभिन्न तालिमहरु दिँदै आएको छ ।