May 18, 2024

चितवनको सरकारी अस्पतालमा आकस्मिक सेवा र सरुवा रोग भवनको शिलान्यास

November 30, 2020

चितवन / स्वास्थ्य तथा जनसंख्या मन्त्री भानुभक्त ढकालले चिकित्सक एवम् स्वास्थ्यकर्मीहरु सरकारी अस्पतालभन्दा बाहिर बढी व्यस्त हुने गरेको बताए । चितवनस्थित भरतपुर अस्पतालको आकस्मिक सेवा भवन र सरुवा रोग सेवा भवनको शिलान्यास कार्यक्रममा मन्त्री ढकालले चिकित्सक एवम् स्वास्थ्यकर्मीहरु सरकारी अस्पतालभन्दा बाहिर बढी व्यस्त हुने भएकाले सरकारी अस्पतालको सेवा प्रभावित बन्ने गरेको बताएका हुन् ।
उनले सरकारी अस्पतालको पारिश्रमिकले कम भएकाले यसलाई व्यवस्थापन गर्न सरकारले एक चिकित्सक एक स्वास्थ्य संस्था कार्यक्रम पाइलट प्रोजेक्टको रुपमा ल्याउन लागेको जानकारी गराए । उनका अनुसार कोरोना भाईरस (कोभिड १९) विरुद्धको खोप ७२ प्रतिशत जनतालाई उपलब्ध गराउने र १४ वर्ष मुनिकाका लागि खोप परीक्षण नै नगरिएकाले लगाउन नमिल्ने बताए । उहाँले खोप कति अनुदानमा र कति सरकारले खरिद गरेर ल्याउने भन्ने विषयमा सरकारीले निर्णय गर्न बाँकी रहेको बताए ।
उनले भने “खोप विश्व स्वास्थ्य संगठनले प्रमाणित गरे लगत्तै नेपालमा पनि उपलब्ध हुन्छ ।” कोरोना उपचार र नियन्त्रणका लागि सरकारले गरेको काम उल्लेखनीय रहेको उनको भनाइ छ । सरकार प्रदेशमा ५० शैयाको र केन्द्रमा ३०० शैयाको ल्याब सहितको सरुवा रोग उपचारका लागि अस्पताल बनाउने अभियानमा लागेको र पहिले भएका अंचल अस्पताललाई दुई सय शैयाको पु¥याइन्छ भने सबै जिल्लामा ५० शैयाको अस्पताल बन्ने उनले भने ।
उक्त अवसरमा ५० शैयाको दुई तले सरुवा रोग अस्पताल भवन र ५० शैयाको आकस्मिक कक्ष भवन बन्ने छ । सरुवा रोग भवन निर्माण गर्न रु. ८ करोड बजेट सरकारले विनियोजन गरिसकेको छ । क्रमागत योजना अन्तर्गत दुई वर्षमा सम्पन्न हुने छ । आकस्मिक कक्ष भवन एक वर्षमा सम्पन्न गर्ने योजना रहेको छ । रु. ११ करोड लागतमा निर्माण सम्पन्न हुने अनुमान गरिएको भवनको लागि सरकारले रु.९ करोड बजेट विनियोजन गरिसकेको उनले जानकारी गराए ।

- ADVERTISEMENT -
- ADVERTISEMENT -
- ADVERTISEMENT -