मनहरिमा तेस्रो अध्यक्ष कप नकआउट प्रतियोगिता हुने

मनहरि / मनहरि तेस्रो अध्यक्ष कप नकआउट फुटबल प्रतियोगिता हुने भएको छ । मनहरि–७ को प्रस्तावित मदन भण्डारी स्मृति रंगशालामा मंसिर २७ गतेबाट अध्यक्ष कप नकआउट प्रतियोगिता हुने खेलकुद विकास समिति मनहरिका अध्यक्ष नविन सुवेदीले जानकारी दिए ।
अध्यक्ष सुवेदीका अनुसार गाउँपालिकाको प्रत्येक वडालाई समेटेर प्रतियोगिता गर्न लागेको हो । प्रतियोगितामा गाउँपालिकाको ९ वटा वडाको ९ टीम सहभागी हुने उनले बताए । प्रतियोगिता सञ्चालनका लागि अनुमानित ७ लाख १७ हजार खर्च लाग्ने उनको भनाइ थियो ।
मनहरि गाउँपालिकाका अध्यक्ष एकराज उप्रेतीले गाउँपालिकाले स्थानीय खेल र खेलाडीलाई प्रोत्साहन गरी विभिन्न कार्यक्रमहरु सञ्चालन भइरहेको बताए । गाउँगाउँबाट सम्भावना बोकेका प्रतिभावान खेलाडीहरु उत्पादन गर्न प्रतियोगिताले भूमिका खेल्ने उनले भने ।
कार्यक्रममा मनहरी गााउँपालिकाका प्रमुख प्रसाशकीय अधिकृत देवराज चौलागाई, नेकपा मनहरिका सचिव हेमलाल उप्रेती, समाजसेवी चन्द्रबहादुर राई लगायतको उपस्थिति रहेको थियो ।
प्रतियोगितामा हरेक वडाको टिमबाट सहभागी खेलाडी सोही वडाकै बासिन्दा हुनुपर्ने नियम राखिएको छ भने विजेता र उपविजेतालाई क्रमशः १ लाख र ५० हजार नगदसहित शिल्ड, मेडल र प्रमाणपत्र प्रदान गरिने बताइएको छ । विभिन्न विधाहरुमा पनि उत्कृष्ट हुनेलाई नगद पुरस्कार दिइने आयोजकले जनाएको छ ।