July 21, 2024

पुनर्निर्माणका लागि ३० करोड ६० लाख सहयोग

January 7, 2021

काठमाडौं / नेपालस्थित भारतीय राजदूतावासले नेपालको विद्यालय पुनर्निर्माणकालागि ३० करोड ६० लाख सहयोग गरेको छ। भारतीय राजदूतावासका नियोग उप-प्रमुखले बुधबार राष्ट्रिय पुनर्निर्माण प्राधिकरणका प्रमुख कार्यकारी अधिकृतलाई भूकम्प प्रभावित विद्यालयको पुनर्निर्माणका लागि ३० करोड ६० लाखको चेक हस्तान्तरण गरेको हो।
राजदूतावासका नियोग उप–प्रमुख श्रीमती नामग्य खम्पाले पुनर्निर्माण प्राधिकरणका प्रमुख कार्यकारी अधिकृतश्री सुशील ज्ञवालीलाई भेटी नेपाल सरकारले पुनर्निर्माणको क्षेत्रमा गरेको प्रयासमा हातेमालो गर्न भारत सरकार प्रतिबद्ध रहेको बताए। चेक हस्तान्तरणसँगै भारतले शिक्षा क्षेत्र पुनर्निर्माण परियोजनाका लागि नेपाल सरकारलाई करिब ८२ करोड रकम सोधभर्ना गरेको छ।
नेपालमा शैक्षिक संस्थाहरुको पुनर्निर्माणका लागि भारतले प्रतिबद्धता गरेको ५० मिलियन अमेरिकी डलर अनुदान सहयोग कार्यक्रम अन्तर्गत त्रिभुवन विश्वविद्यालय केन्द्रिय पुस्तकालय भवन लगायत ७१ वटा परियोजनाको सञ्चालन हाल राष्ट्रिय पुनर्निर्माण प्राधिकरणले गरिरहेको छ।
यी परियोजनाहरु गोरखा, नुवाकोट, रामेछाप, दोलखा, काभ्रे, धादिङ र सिन्धुपाल्चोक जिल्लामा रहेका छन्। गोरखामा ३ र नुवाकोटमा ५ वटा विद्यालयको निर्माण सम्पन्न भएका छन् भने अन्य पाँच जिल्लामा ५६ विद्यालयहरु निर्माणाधीन अवस्थामा रहेकोमा ७ वटा विद्यालय ठेक्का हस्तान्तरणको अन्तिम चरणमा रहेको प्राधिकरणले जानकारी दिएको छ।

- ADVERTISEMENT -
- ADVERTISEMENT -