प्रम ओलीद्वारा पुल्चोक–गोन्द्राङ सडकखण्ड र सिटीहलको शिलान्यास

चितवन / प्रधानमन्त्री एवं नेपाल कम्युनिष्ट पार्टी (नेकपा) का अध्यक्ष केपी शर्मा ओलीद्वारा चितवनको भरतपुरमा दुई आयोजनाको शिलान्यास गरेका छन् । प्रधानमन्त्रीले भरतपुरका दुई आयोजना पुल्चोक–गोन्द्राङ सडक विस्तार र सिटीहलको शनिबार शिलान्यास गरेका हुन् ।
खराब मौसमका कारण मध्यान्ह सुरु हुने भनिएको कार्यक्रम केही ढिला भएको आयोजकले जनाएको छ । भरतपुरका दुई विकास आयोजनाको शिलान्यास र जनसभालाई सम्बोधन गर्न ओली चितवन आएका हुन् । भरतपुर महानगरपालिका–१० स्थित बाइपास सडकसँगै चार बिघा चार कठ्ठा जमिनमा सिटीहल निर्माणको काम सुरु भएको छ । संघिय सरकारको बजेटबाट सघन शहरी तथा भवन निर्माण आयोजना चितवनले बोलपत्र आह्वान गरी आयोजना अघि बढाएको हो ।
यस्तै नारायणगढको पुल्चोकदेखि गोन्द्राङसम्मको छ लेन सडक दुई वर्ष चार महिनाभित्र बनिसक्ने गरी रु एक अर्ब १२ करोडमा ठेक्का लगाइएको छ । पूर्वपश्चिम राजमार्गअन्तर्गतको उक्त सडक खण्ड भरतपुर र नारायणगढको मुख्य शहरी क्षेत्रमा पर्दछ । यी दुवै आयोजनाको काम सुरु भइसकेको छ ।