व्यवसायिक कृषिमा एनसीसी बैंकको सम्झौता

चितवन / चितवनका दुग्ध उत्पादक किसानलाई लक्षित गर्दै व्यवसायिक कृषि तथा पशुपक्षी कर्जासम्बन्धी समझदारीमा हस्ताक्षर भएको छ । चितवन जिल्ला दुग्ध उत्पादक सहकारी संघ र नेपाल क्रेडिट एण्ड कमर्स (एनसीसी)बैंक लिमिडेट बीच आइतबार उक्त सहमतिमा हस्ताक्षर भएको हो ।
आइतबार संघको कार्यालयमा संघका अध्यक्ष रत्नमणि न्यौपाने र बैंकको तर्फबाट प्रमुख कार्यकारी अधिकृत (सिइओ) रमेशराज अर्यालले समझदारी पत्रमा हस्ताक्षर गर्नुभएको हो । यो सम्झौता एक वर्षको लागि लागू हुने सिइओ अर्यालले बताउनुभयो । सहकारी संघ र बैंकबीचको समझदारीले किसान र बैंकबीचको सम्बन्ध नजिकिने संघका अध्यक्ष न्यौपानेले बताउनुभयो ।
बैंकले पनि किसान र बैंक दुवैलाई फाइदा हुने गरी काम गरेको जनाएको छ । किसानसँग सहकार्य गरेर बैंकले आफ्नो क्षेत्र थप फराकिलो बनाउने प्रयास गरिएको बैंकका सिइओ अर्यालले बताउनुभयो । दुवै पक्षबीच भएको समझदारीअनुसारका काम गर्दै जाने उहाँले बताउनुभयो । आवश्यक परे आगामी वर्ष पनि थप नवीकरण गर्न सकिने उहाँले बताउनुभयो ।
चितवन दुग्ध उत्पादनको क्षेत्रमा अग्रणी जिल्लाको रुपमा चिनिन्छ । त्यसैले बैंकसँगको सहकार्यबाट उत्पादनलाई वृद्धि गर्न सकिने लक्ष्य लिइएको संघका सचिव किशोर बगालेले बताउनुभयो । किसानले अनुदान लिँदा बैंकबाट ३० प्रतिशत ऋण लिएको हुनुपर्ने भएकाले समेत बैंकसँग सम्झौता गरिएको बगालेको भनाइ छ ।