चितवन / भरतपुर ११ बाइपासरोडमा अवस्थित एस एण्ड पी अटिडिङ कम्पनीले शैक्षिक सामग्री सहयोग गरेको छ । भरतपुर महानगरपालिका वडा नं. १५ गोपालगञ्जमा रहेको श्री आधारभुत विद्यालयलाई शनिबार ६७ वटा स्कुल ब्याग सहयोग गरिएको हो । कम्पनीका प्रबन्ध निर्देशक सूर्य श्रेष्ठले विद्यालयका प्रधानाध्यापक चिरञ्जीवी नेपाललाई उक्त सामाग्री हस्तारन्तरण गरे ।
कार्यक्रमका प्रमुख अतिथि भरतपुर १५ का वडाध्यक्ष शम्भुबहादुर भण्डारीले एक वर्षमा स्कुलको स्तरोन्नति गर्ने बताए । उनले विद्यालयको लागि आफूले सक्दो सहयोग गर्ने प्रतिबद्धता व्यक्त गरे । हरेक सचेत नागरिकले आफ्ना बाबुनानीलाई सामुदायिक विद्यालयमा पठाउन उनको आग्रह थियो ।
उनले सचेत नागरिकहरुले बालबालिकालाई सामुदायिक विद्यालय नपठाउँदा वर्षेनी सामुदायिक विद्यालयको गुणस्तर खस्किदै गएको बताए । सामुदायिक विद्यालयलाई निम्नवर्गका विद्यार्थी मात्र अध्ययन गर्ने विद्यालय नभई सचेत तथा सम्पन्न वर्गका विद्यार्थीहरु पनि अध्ययन गर्ने विद्यालयको रुपमा विकास गर्दै लैजानु पर्नेमा उनले जोड दिए ।
यस्तै उनले उक्त विद्यालयमा होस्टल निर्माणका लागि पहल गर्ने प्रतिवद्धता पनि जनाए । उद्योग वाणिज्य संघ चितवनका उपाध्यक्ष ई भोजराज कौडालले गुणस्तरीय शिक्षा दिन सके सामुदायिक विद्यालयप्रति अभिभावक र विद्यार्थीको आकर्षण बढ्ने बताए ।
कम्पनीका सञ्चालक श्रेष्ठले व्यवसायबाट भएको कमाईको केही हिस्सा यसरी नै शैक्षिक क्षेत्रमा सहयोग गर्दै जाने बताए । उनले बालबालिकाको उज्वल भविष्यका लागि आगामी दिनमा पनि यसरी नै सहयोग गर्ने प्रतिवद्धता जनाए । उनले श्री आधारभुत विद्यालयलाई छिट्टै थप अन्य शैक्षिक सामाग्री पनि सहयोग गर्ने बताए ।
२०२८ सालमा स्थापना भएको विद्यालयमा अहिले कक्षा ३ सम्म मात्र अध्यापन हुँदै आएको छ । विद्यालयमा अहिले ६७ जना बालबालिका अध्ययनरत छन् ।
- ADVERTISEMENT -
