चितवनमा १२ हजार बढीले लगाए कोरोना विरुद्धको खोप

चितवन / चितवनमा कोरोना संक्रमण भाइरस विरुद्धको खोप चार दिनमा १२ हजार ७ सय १९ जनाले लगाएको स्वास्थ्य कार्यालय चितवनले जनाएको छ । स्वास्थ्य कार्यालय चितवनका अनुसार स्थानीय निकायहरुको स्वास्थ्य चौकीबाट भदौ १५ गते देखि १८ गतेसम्म (चार दिन) खोप अभियान कार्यक्रम चलाएको हो ।
जसअन्तर्गत १८ वर्ष माथिका १२ हजार बढीले कोरोना विरुद्धको खोप लगाएका हुन् । कार्यालयको सार्वजनिक तथ्याङ्कमा अन्तिम दिन शनिबार २ हजार ३ सय ५७ जनाले खोप लगाएसंगै कुल खोप लगाउनेको संख्या १२ हजार ७ सय १९ जना पुगेको हो । यीमध्ये ४ हजार ९ सय ९६ जनाले एष्ट्राजेनिकाको खोप लगाएका छन् भने ८ हजार २ सय २३ जनाले भेरोसेल खोप लगाएका हुन् ।
खोप अभियान अन्तर्गत ४ दिनसम्म चलेको कोरोना विरुद्धको पहिलो खोप अभियानमा कुल ५ हजार ६ सय ४९ महिला र ७ हजार ७० पुरुष सहभागी भएका थिए । चिकित्सा क्षेत्र तथा प्राविधिकतर्फका विद्यार्थीहरुलाई खोप लगाइएको हो ।
यस सँगसँगै उद्योग संघमा आवद्ध कर्मचारी तथा मजदुरहरु, अटोमेकानिकल व्यवसायीसँग आबद्ध मजदुरहरु, पर्यटनमा आबद्ध होटल व्यवसायी तथा कर्मचारीहरुलाई खोप उपलब्ध गराइएको थियो ।
साथै भदौ २१ गतेबाट ४० वर्ष माथिका व्यक्तिहरुलाई खोप लगाइने कार्यालयले जनाएको छ ।