विप्लवका १६ कार्यकर्ता बन्द खुलेसँगै रिहा

चितवन / नेत्र बिक्रम चन्दको नेकपाले आव्हान गरेको नेपाल बन्दका क्रममा चितवनबाट पक्राउ परेका १६ जना पक्राउ परेका थिए । उनीहरुलाई बन्द खुले लगत्तै रिहा गरिएको छ ।
पेट्रोलियम पदार्थको मूल्य वृद्धिको विरोधमा विप्लव समूहले मंगलवार बिहानैदेखि चितवन लगायत देशभर वन्दको आह्वान गरेको हो । बिहान सबेरैदेखि भएको बन्द साँझ पाँच बजे खुलेसँगै पक्राउ परेका कार्यकर्तालाई प्रहरीले रिहा गरिएको छ ।
अबका दिनमा यस्ता कार्य नगर्ने नगराउने शर्तमा रिहा गरिएको चितवनका प्रवक्ता एवं प्रहरी नायव उपरीक्षक सूर्यबहादुर थापाले जानकारी दिए । बन्द गर्दै हिँडेका ९ जना कार्यकर्तालाई नारायणगढको लायन्सचोकबाट प्रहरीले पक्राउ गरेको थियो भने अन्यलाई बाइपास रोड लगायत विभिन्न ठाउँबाट पक्राउ गरिएको प्रहरीले बताएको छ ।
बन्दले दिनभर यातायात नचलेपछि लामो यात्रा गर्ने यात्रुहरुले सास्ती खेप्नु परेको थियो । बन्द खुलेसँगै चितवनका विभिन्न स्थानबाट लामो तथा छोटो दुरीका सवारी साधनहरु संचालनमा आएका छन् ।
बन्दको दिन यातायात अबरुद्ध गर्न खोजेपछि बिप्लवका कार्यकर्ता र प्रहरी बिच केहिबेर घम्साघम्सि समेत भएको थियो । बन्दका कारण चितवनको नारायणगढ, हाकिमचोक, टाँडी, पर्सा, चनौलीलगायतका बजारहरु बन्द भएका थिए ।