एमालेको महाधिवेशनमा पाहुन बन्नु छैन : अध्यक्ष नेपाल

चितवन / नेपाल कम्युनिष्ट पार्टी (एकिकृत समाजवादी) का अध्यक्ष माधवकुमार नेपालले एमालेको महाधिवेशनमा पाहुना बन्न आवश्यक नरहेको बताएका छन् ।
भरतपुर विमानस्थलमा समाजबादी प्रेस संगठन चितवनले आयोजना गरेको पत्रकार सम्मेलनमा उनले यस्तो बताएका हुन । नेता अध्यक्ष नेपालले आफ्ना बारेमा टिप्पणी गरेर एमालेले आफ्नो चरित्रलाई आफै उजागर गर्ने काम भएको बताए ।
आफूहरुलार्ई महाधिवेशनमा कसैको पाहुना बन्न आवश्यक नरहेको बताउँदै उनले भने, ‘हामी आफ्नै काम र धुनमा व्यस्त छौं ।’उनले नेकपा एमाले अब इतिहासको विषय बन्ने बताउँदै नेकपा एस उदाउँदै जाने दाबी गरे ।
अहिले आफूहरुको एजेण्डा पार्टी बनाउनेतर्फ रहेको उनले बताए । उनले भने, ‘नेकपा एसको नाम सुन्ने बित्तिकै धेरै मान्छे डराउन थालेका छन् । किनकी सारा जनता र पार्टीको ध्यान यो पार्टीमा परेको छ । यो पार्टीको विकास देखेर धेरैमा ईष्र्या पलाएको छ ।’ उनले नेकपा एसले अबको निर्वाचनमा सबैतिर जित्ने पनि दाबी गरेका छन् ।
न्यायालयको विवादका बारेमा बोल्दै नेपालले यस विषयमा प्रधानमन्त्री र राजनैतिक दलले पनि एउटा निष्कर्ष निकाल्नुपर्ने बताए । समाजबादी प्रेस संगठनका जिल्ला अध्यक्ष टीकादत्त तिमिल्सिनाको अध्यक्षतामा भएको कार्यक्रम सचिव रामु आचार्यले सञ्चालन गरेका थिए ।