नेकपा माओवादी भरतपुर १२ मा घिमिरे सर्वसम्मत

भरतपुर / नेकपा कम्युनिस्ट पार्टी (माओबादी केन्द्र) भरतपुर वडा नं १२ को अध्यक्षमा मदनकृष्ण घिमिरे सर्वसम्मत चुनिनु भएको छ । आज शनिबार भएको वडा अधिवेशनमा घिमिरेको नेतृत्वमा ४५ सदस्यीय वडा कमिटी सर्वसम्मत चुनिएको हो ।
समितिको उपाध्यक्ष लिला पौडेल अधिकारी, सचिवमा भिम गुरुङ, कोषाध्यक्षमा सिता सुवेदी र सहसचिवमा अनिल घिमिरे चुनिनु भएको छ ।
माओवादी केन्द्रले इतिहासमै भव्य र जनवाद प्रयोग गरी गरेको अधिवेशनका कारण सिङ्गो वडाका नेता कार्यकर्ता उत्साहित भएको नवनिर्वाचित अध्यक्ष घिमिरेले बताए । अब समितिका सबै सदस्य क्रियाशील भएर जनताको घरदैलोमा पुग्ने र राजनीति मार्फत जनसेवा गर्ने उनको भनाइ थियो । भरतपुर १२ मा करिव ६ सय संगठित सदस्य छन् ।
अधिवेशनको उद्घाटन समारोहमा माओवादीका अग्रज नेता टेकबहादुर थापाले राजनीतिमा धैर्यता, लगन र अनुशासन हराउँदै जान लागेकोले अब नयाँ पुस्ता संवेदनशील बन्नुपर्ने बेला आएको बताए । माओवादीको कार्यक्रम र आन्दोलनलाई जनतामा लगेर बुझाउदै अगाडि बढे पुनः माओबादी पहिलो पार्टी बन्ने दावी उनको थियो ।
युवा नेतृ निशा न्यौपानेले यस पटकको अधिवेशनले पार्टीलाई पुनः पुरानै लयमा फर्कन सहज हुने बताए । माओबादी सरकारमा हुँदा गरेका राम्रा कामहरुको पनि उचित प्रचार गर्न नसकेको भन्दै सबै कार्यकर्ताले माओवादीको कार्यक्रम र आन्दोलनबारे घरघरबाट बहस थाल्नुपर्ने उनको भनाइ थियो ।