चितवनको दिव्यनगर खानेपानी आयोजनाको प्रचण्डद्वारा शिलान्यास

चितवन / दिव्यनगर खानेपानी तथा सरसफाइ उपभोक्ता संस्थाको आयोजनामा भरतपुर–२६ दिव्यनगरमा खानेपानी आयोजनाको शिलान्यास गरिएको छ । नेकपा माओवादी केन्द्रका अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ले शनिबार उक्त खानेपानी आयोजनाको शिलान्यास गरेका हुन् ।
करिब २१ करोडको लगानी रहने उक्त खानेपानी आयोजनाको निर्माणका लागि सरकारले ९० प्रतिशत र उपभोक्ताले १० प्रतिशत लगानी रहने उपभोक्ता संस्थाले जनाएको छ ।
उक्त आयोजनामा ४५० घनमिटरको एउटा ओभरहेड ट्यांकी, कार्यालय भवन, गार्ड हाउस, १२६ किमी पाइप जडान, १८ सय ५५ धारा जडान गरिने बताइएको छ भने २०८० असारसम्म सम्पन्न गरिने दिव्यनगर खानेपानी तथा सरसफाइ उपभोक्ता संस्थाका अध्यक्ष तुलाराम आचार्यले जानकारी दिए ।
अध्यक्ष प्रचण्डले नारायणी नदीको तटवन्धन गर्ने आयोजना पनि बहुवर्षीय ठेक्का प्रकृयामा गइसकेकोले निर्माण कार्य तत्काल सुरु हुने बताए । तटवन्धनका लागि पाँच अर्ब बराबरको डिपिआर तयार भइसकेको र आगामी फागनुसम्ममा नदी कटान भएका क्षेत्रहरूमा तटवन्धन कार्य सम्पन्न हुनेगरी काम गर्न लागिएको उनको भनाइ थियो ।
भरतपुर–२६ दिव्यनगरका वडाध्यक्ष ज्ञानप्रसाद खनालका अनुसार दिव्यनगर खानेपानी आयोजना निर्माणपछि एक हजार ८५५ घरधुरीले शुद्ध खानेपानी पाउने छन् ।