बागमती प्रदेशको एक हप्ते आधारभुत पत्रकारिता तालिम सुरु

–प्रमिला तामाङ
धुलिखेल । बागमती प्रदेशका पत्रकारहरुको लागि आधारभूत पत्रकारिता तालिम धुलिखेलमा बिहीबारदेखि सुरु भएको छ । आन्तरिक मामिला तथा कानुन मन्त्रालय संचार रजिष्ट्रारको कार्यालय बागमती प्रदेशको आयोजनामा उक्त तालिम एक साता संचालन हुने भएको हो ।
कार्यक्रमका प्रमुख अतिथि तथा आन्तरिक कानुन तथा मामिला मन्त्री कृष्णप्रसाद खनालले पानसमा दियो प्रज्वलन गरी कार्यक्रम उद्घाटन गरेको हो । कानुनमन्त्री खनालले पहिलेको तुलनामा पत्रकारिता अहिले धैरै फरक भएको बताए । अहिलेको पत्रकारिता ग्लोबलस्तरको भएको उनको भनाइ थियो ।
उक्त तालिममा महिलालाई ७० प्रतिशत र पुरुषलाई ३० प्रतिशत अवसर भएको उनले बताए । एक वर्षमा ५ जना जेष्ठ पत्रकारलाई सम्मान गरिने उनले भने ।
कार्यक्रममा बागमती प्रदेशका सञ्चार रजिष्ट्रार रेवतीप्रसाद सापकोटाले पत्रकारको आचांरसहिता, पत्रकारको कानुन सम्बन्धी शिक्षा, पत्रकारको लागि भिडियो ईडिट, फोटो ईडिट, न्यूज सन्चालन गर्ने, अनलाईन पत्रकारिताको शिक्षणसम्बन्धी आधारभुत पत्रकारिताको तालिम दिइने बताए ।
कार्यक्रममा आन्तरिक कानुन मामिला सचिव रुद्रमान तामाङ, सञ्चार रजिष्टे«सन प्रमुख शिवराम पोख्रेल, पत्रकारिता विषयका प्रमुख शिक्षक विनोद ढुङ्गेललगायतको उपस्थिति रहेको थियो । उक्त तालिममा १५ जना पत्रकारहरुको सहभागी रहेका छन् ।