आज बालुवाटारमा सत्ता गठबन्धनको बैठक बस्दै

काठमाडौं / सत्ता गठबन्धनका शीर्ष नेताको बैठक बालुवाटारमा बस्दैछ । आसन्न राष्ट्रिय सभाको निर्वाचनको विषयमा छलफल गर्न सत्तारुढ पाँच दलको बैठक आज सोमबार बिहान बालुवाटारमा बोलाइएको हो ।
माघ १२ गते राष्ट्रियसभा सदस्यको निर्वाचनका लागि मंगलबार उम्मेदवारी दर्ताको निर्वाचन आयोगको कार्यतालिका रहेको छ । उम्मेदवारी दिने समय नजिकिएपनि गठबन्धनभित्र कुनै छलफल भएको छैन । सोमबारको बैठकमा राष्ट्रिय सभाको निर्वाचनमा सत्ता गठबन्धनमा सहभागी दलबीच कसरी अगाडि बढ्ने भन्ने विषयमा छलफल मुख्य एजेन्डा रहेको प्रधानमन्त्री सचिवालयले जनाएको छ ।
सत्ता गठबन्धनमा नेपाली कांग्रेस, नेकपा माओवादी केन्द्र, नेकपा (एकीकृत समाजवादी), जनता समाजवादी र राष्ट्रिय जनमोर्चा सहभागी छ ।
संघीय संसद् सचिवालयका अनुसार एमालेका ८, कांग्रेसका ३, एकीकृत समाजवादी र माओवादीका ४–४ गरी १९ जना नयाँ सांसद निर्वाचित गर्नका लागि मतदान हुन लागेको हो । प्रधानमन्त्रीको सिफारिसमा राष्ट्रपतिले एक मनोनीत गर्ने एक जना सांसद्को पनि अवधि सकिन लागेको हो । २० जना सांसदको फागुन २१ गते कार्यकाल समाप्त हुँदैछ ।