चितवनका तीन कृषकहरु पुरस्कृत

चितवन / कृषि ज्ञान केन्द्र, चितवनले तीनजना कृषकलाई राष्ट्रपति उत्कृष्ट कृषक पुरस्कारबाट पुरस्कृत गरेको छ । आज बागमती प्रदेशका कृषि तथा पशुपन्छी विकास मन्त्रालयका सचिव डा शरणकुमार पाण्डेले उनीहरुलाई पुरस्कृत गरेका हुन् ।
पुरस्कृत हुनेहरुमा तरकारी कृषक भरतपुर महानगरपालिका वडा नम्बर २५ का शोभाकान्त्त भूषाल, रत्ननगर नगरपालिका १२ का केरा कृषक शंकरप्रसाद सुवेदी र भरतपुर महानगरपालिका ६ मा रहेको अन्नपुर्ण दुग्द्य उत्पादक सहकारी संस्था रहेका छन् ।
उनीहरुलाई प्रतिव्यक्ति १० हजार रुपैंया र सम्मानपत्र प्रदान गरिएको कार्यालयका योजना अधिकृत उमराज अर्यालले जानकारी दिए । कृषि ज्ञान केन्द्रले हरेक बर्ष तीन जना किसानलाई राष्ट्रपति उत्कृष्ट कृषक पुरस्कारबाट पुरस्कृत गर्ने गर्दछ । पुरस्कृतका लागि केन्द्रले किसानहरुलाई दरखास्त आह्वान गरेको थियो ।
दरखास्त आह्वानमा कृषि तर्फ १० र पशुपन्छि तर्फ ५ गरि १५ जनाले निवेदन दिएका थिए । उनीहरु सबैको फर्ममा जिल्ला कृषि विकास समन्वय समितिले स्थलगत अवलोकन पश्चात उत्कृष्ट कृषक छनोट गरिएको राष्ट्रपति उत्कृष्ट कृषक पुरस्कार छनोट समितिका सदस्य भेटेनेनरी अस्पतालका निमिक्त प्रमुख डा। प्रभात न्यौपानेले जानकारी दिए । छनोट समितिमा कृषि ज्ञान केन्द्र, जिल्ला समन्वय समिति र भेटेनेनरी अस्पताल रहेको थियो ।