राप्ती मेयरमा शमशेर लामा, उपमेयरमा देवेन्द्र लामा निर्वाचित

चितवन । राप्ती नगरपालिकाको मेयरमा पाँच दलिय गठबन्धन नेकपा एकीकृत समाजवादीका शमशेर लामा विजयी भएको छ । मेयरमा लामाले १२ हजार ५ सय २४ मत प्राप्त गरी विजयी भएको हो ।
मेयर लामाका प्रतिद्वन्द्वी एमालेका गोविन्द कंडेलले १२ हजार ५१ मत मत मात्र प्राप्त गरेका हुन् । लामाले कंडेललाई ४ सय ७३ मतान्तरणले पछि पारेका छन् ।
नवनिर्वाचित मेयर लामा राप्ती वडा नं. ४ का निवर्तमान वडाअध्यक्ष समेत हुन् । वडाध्यक्षमा रहँदा उनले गरेको कामले नै उनलाई पुनः विजयी हुन सघाउ पुगेको अनुमान स्थानीयले गरेका छन् ।
त्यस्तै गठबन्धनकै उपमेयरमा नेपाली कांग्रेसका देवेन्द्र लामा निर्वाचित भएका छन् । उपमेयर लामाले १२ हजार ६ सय ८२ मत प्राप्त गरेका हुन् भने उनका प्रतिद्वन्द्वी मेनुका पाठकले १२ हजार ४ सय ४८ मत ल्याएकी हुन् । उपमेयर लामाले र पाठकलाई २ सय ३४ मतान्तरले पराजित गरेका हुन् ।
राप्ती नगरको प्रमुख उपप्रमुखसहित ४ वटा वडा गठबन्धन तर्फबाट नेपाली कांग्रेसले जितेका छन् भने बाँकी ९ वडामा नेकपा एमाले विजयी भएका छन् । राप्ती नगरपालिकाको वडा नम्बर ४,६,५,८,१,२ र ३ मा एमालेका उम्मेदवार विजयी भएका छन् भने वडा नम्बर १३,१२,१०,९ मा नेपाली कांग्रेस विजयी भएका छन् ।
राप्ती वडा नम्बर ११ मा एकीकृत समाजवादीले जित हासिल गरेको छ । त्यस्तै वडा नम्बर ७ को वडा अध्यक्षमा स्वतन्त्र उम्मेदवार सुमिता डल्लाकोटी विजयी भएकी छिन् ।
राप्ती नगरपालिकामा नेकपा माओवादीका वडाअध्यक्ष तहमा कुनै पनि वडा विजयी भएका छैनन् भने नेकपा माओवादीको प्रतिनिधित्व जनाउँदै दलित सदस्य तर्फबाट दिलकुमारी परियारले ११ नम्वर वडा वाट सदस्यमा विजयी भएकी छिन् ।