आश्रमका ४४ जनालाई स्थापना दिवसमा एक दिनको भोजन

चितवन / सिद्धिविनायक बचत तथा ऋण सहकारी संस्था लिमिटेड (साकोस) भरतपुर–२ क्षेत्रपुरले मानव सेवा आश्रम बेलचोकमा एक दिनको भोजन वितरण गरेको छ । संस्थाले १५औं स्थापना दिवसको अवसर पारेर आश्रमका आश्रितहरुलाई आइतबार भोजन वितरण गरेको संस्थाका अध्यक्ष थिरप्रसाद धितालले जानकारी दिए ।
संस्थाले दुई दिने कार्यक्रम अन्तर्गत आज दोश्रो दिन आश्रममा भोजन वितरण गर्नु पूर्व कार्यालयमा केक काटेर स्थापना दिवस मनाएको हो । उक्त आश्रममा ४४ जना आश्रित छन् ।
यसअघि आश्रम भरतपुर ११ बाइपास रोडमा भाडाको घरमा रहेको थियो भने हालै मात्र बेलचोक आफ्नै भवनमा स्थानान्तरण भएको हो ।
संस्थाले पहिलो दिन भरतपुर वडा २ का वडाध्यक्ष मनोज रानाभाटसहितका जनप्रतिनिधिहरुलाई बधाई तथा सम्मान गरेको थियो भने कार्यालय भएको तरकारी बजारबाट रामेश्वर मन्दिर, जलमा हलचोकबाट डाङ्ग्रेचोक हुँदै पुनः तरकारी बजारससम्मको सडक दायाँबायाँ सरसफाइ गरिएको थियो ।
कार्यक्रममा फलफुल तथा तरकारी थोक व्यवसायी संघका अध्यक्ष मुकुन्दप्रसाद गौतम, संस्थाका कोषाध्यक्ष जयराम पाण्डे, व्यवस्थापक विकास पौडेल, शम्भु अधिकारीलगायतको उपस्थिति थियो ।