अक्षयकोष स्थापनाका लागि तमू संचारकर्मीलाई १ लाख सहयोग प्राप्त हुने

चितवन / बागमती प्रदेश सभा सदस्य रीना गुरूङबाट तमू सञ्चारकर्मी संघ (एटजोन) चितवनको लागि अक्षयकोष स्थापनापनार्थ १ लाख सहयोग प्राप्त हुने भएको छ ।
प्रदेश सभा सदस्य गुरुङले सोमबार संघको जिल्ला शाखाको पदाधिकारी तथा केन्द्रीय समितिका सचिव तथा कार्यसमिति सदस्यहरूसँगको विशेष भेटका क्रममा सो सहयोग गर्ने बताएका हुन् ।
राप्रपाकी केन्द्रीय सह–महामन्त्रीसमेत रहेकी सांसद गुरूङले संघको लागि पूर्ण समर्थन र सहयोग गर्न तयार रहेको बताइन् । चितवन जिल्लामा पनि तमू (गुरूङ) समुदायबाट सञ्चारकर्ममा लागेका व्यक्तिहरूको उत्थान र संरक्षणमा टेवा पुगोस् भन्ने उद्देश्यले अक्षयकोष स्थापना गरिदिने योजना बनाएको उनले बताइन् ।
‘मेरो सोच र योजना धेरै पुरानो हो, तर बल्ल अवसर जुरेको छ,’ उनले भनिन्, ‘म आफैँ पनि सञ्चारकर्ममै रहेको व्यक्ति भएकोले आफ्नै क्षेत्रको लागि केही न केही गर्नुपर्छ भनेर लागेकी छु ।’
भेटघाटमा एटजोन चितवनका अध्यक्ष तुलमान गुरूङ, सचिव राजनदिल गुरूङ, सह–सचिव गीता गुरूङ, सदस्यहरू ममता गुरूङ र कमला गुरूङ तथा केन्द्रीय सचिव चित्र ‘सोल्टी’ गुरूङ, केन्द्रीय सदस्य सीतादेवी तमुस्यो, तमू (गुरूङ)लगायतको उपस्थिति थियो ।
संघको लागि तमू ह्युल छोँज धीँ गुरूङ राष्ट्रिय परिषद चितवनले कार्यालय समेत उपलब्ध गराएको छ । महाबौद्ध गुम्बा तीनखोलेस्थित तमू ह्युल छोँज धीँ चितवनले निर्माण गरेको संग्रहालय भवनमा कार्यालयको लागि कोठा उपलब्ध गराएको अध्यक्ष गणेशबहादुर गुरूङले बताए ।
यस्तै संघको कार्यालय संचालनका परिषद्ले कोठा उपलब्ध गराइसकिएकोले छिट्टै एक कार्यक्रमको आयोजना गरी कार्यालय उद्घाटन र संचालन गरिने तमू (गुरूङ) सञ्चारकर्मी संघ नेपाल चितवनका अध्यक्ष तुलमान गुरुङले बताए ।