बलेफी गाउँपालिकाको ११ औँ गाउँ सभा बहिस्कार

सिन्धुपाल्चोक । सिन्धुपाल्चोकको बलेफी गाउँपालिकाको ११ औँ गाउँ सभा बहिस्कार गरेका छन् । आर्थिक वर्ष २०७९/०८० को नीति तथा कार्यक्रम र बजेट विनियोजनमा राखेका मागहरू सम्बोधन नभएपछि उपाध्यक्ष सरु लामासहित २८ जना सदस्यहरूले हस्ताक्षर गरी गाउँसभा बहिस्कार गरेका हुन् ।
गाउँ सभाका सदस्यहरूले उठाएका मागहरू उपर अध्यक्षले बेवास्ता गरेकाले सभा बहिस्कार गरेको पालिका उपाध्यक्ष लामाले जानकारी दिइन् । उनका अनुसार असार १२ गतेसम्म गाउँ सभा स्थगित गरिएको बताइन् ।
उनीहरूले बलेफी गाउँपालिकालाई कर मुक्त घोषणा गर्नुपर्ने‚ वडामा जनप्रिय योजनाहरूमा बजेट विनियोजन गर्नुपर्ने‚ हालसम्म निर्माण भएका वडा कार्यालयहरू १‚२‚७ र ८ मा भवन निर्माण गर्नुपर्ने र कक्षा १२ सम्मको शिक्षा निःशुल्क गर्नुपर्ने मागहरू अघि सारेका थिए ।
वडा नं १ का अध्यक्ष हुपबहादुर खड्काका अनुसार हामीले अघि सारेका मागहरू माथि छलफल नै नभएपछि गाउँ सभा बहिस्कार गर्न बाध्य भएको जानकारी दिए ।
गाउँपालिका अध्यक्ष गङ्गाबहादुर तामाङका अनुसार बजेटको सिलिङअनुसार निर्धारित भन्दा बढी बजेट माग भएकाले केही मागहरू सम्बोधन नभएको बताए । कार्यपालिकामा उनीहरू बहुमत भएकाले यो नीति तथा कार्यक्रम पास गर्न नदिएको र नाटकीय ढङ्गले बहिस्कार गरेको उनले दाबी गरे ।
उनले भने‚ ‘३ दिनसम्म बजेटमाथि छलफल‚ सरसल्लाह गरेर बजेट ल्याएको थियो तर यसमा उनीहरू अझै चित्त नबुझेकाले बहिस्कार गरेका हुन् । ’ अझै पनि छलफल गर्न सकिने उनले बताए ।