चितवन / नृत्य निर्देशक संघ नेपाल चितवन शाखा (डिड्यान)ले गुरुपूर्णिमाको अवसर पारेर दिवंगत नृत्य गुरुहरुको सम्झनामा उच्च सम्मान गर्दै दिप प्रज्वलन गरेको छ । बुधबार पोखरा बसपार्कको गौरेश्वर मन्दिरमा गुरुपूर्णिमाको अवसर पारेर दिवंगत नृत्य गुरुहरुको सम्झनामा दिप प्रज्वलन गरेको हो ।
कार्यक्रमका प्रमुख अतिथि तथा भरतपुर महानगरपालिका वडा नं. १ का वडाअध्यक्ष केशव महर्जनले कलाले संस्कृतिको जगेर्ना गर्ने बताए । पश्चिमेली मुलुकको भड्किलो संस्कृतिलाई तिरस्कार गर्न हाम्रो मौलिक कला संस्कृतिलाई प्रोत्साहन गर्न जरुरी भएको वडाध्यक्ष महर्जनको भनाइ थियो ।
पछिल्लो समय विदेशी नृत्य समाजमा भड्किलो हावी हुँदै गएकोले नेपाली मौलिक नृत्य चुनौतीको रुपमा देखिएको उनको जिकिर थियो । नेपाली कला संस्कृतिको सुरक्षाको लागि सबैले आ–आफ्नो स्थानबाट हातेमालो गर्नुपर्ने बेला आएको उनले सुझाव दिए ।
नेपाली संस्कृतिलाई जगेर्ना गर्नु भनेको भावी पिढीलाई सुरक्षित गर्नु, समुन्नत समाज निर्माण र सुसंस्कृति समाजको निर्माणमा इँटा थप्ने काम भएको जिकिर गरे । नृत्य क्षेत्रमा नाम र दाम दुबै भएकाले सबैलाई सफलताको शुभकामना समेत व्यक्त गरेका थिए ।
नृत्य क्षेत्रले समाज रुपमान्तरणको भूमिकामा सहयोग पुग्ने उनको विश्वास थियो भने नृत्य क्षेत्रलाई वडाबाट हुने कुनै पनि सहयोग गर्ने प्रतिबद्धता जनाए ।
- ADVERTISEMENT -
डिड्यान चितवनका अध्यक्ष रेनु तामाङले अग्रजहरुलाई सम्मान गर्दै र नवप्रतिभालाई हौसला दिँदै अघि बढ्ने बताए । नेपाली कला संस्कृति र उत्थानका लागि सदैव लागि पर्ने उनको प्रतिबद्धता थियो ।
कार्यक्रममा दिवंगत नृत्य निर्देशकहरुको सम्झनामा एक मिनेट मौनधारण गरिएको थियो भने उपस्थित सबैले मैनवत्ती प्रज्वलन गरेका थिए । कार्यक्रममा संस्थाका निवर्तमान अध्यक्ष लीलाराज थापामगर, उपाध्यक्ष पुष्प श्रेष्ठ, जनप्रतिनिधि मनोज घिमिरे, चितवन डान्स सेन्टरका प्रमुख प्रशिक्षक मनोज लामा, कलाकार मदन श्रेष्ठलगायतको उपस्थिति रहेको थियो ।
कार्यक्रम डिड्यान चितवनका अध्यक्ष रेनु तामाङको अध्यक्षतामा सम्पन्न भएको थियो भने संचालन बसन्त लामाले गरेका थिए ।
