चितवनमा दिनभर लोडसेडिङ, विद्युत कर्मचारी जाँडपाटीमा

चितवन / नेपाल विद्युत प्राधिकरण भरतपुर वितरण केन्द्रमा खसी काटेर दिनभर जाँडपाटी गरिएको छ । कार्यालय समयमै कार्यालय प्रमुख राजिवकुमार सिंहसहित कर्मचारी र केही बाहिरका मानिस समेत सहभागी गराएर शुक्रबार जाँडपार्टी गरिएको हो ।
कार्यालयले मर्मतका लागि भन्दै शुक्रबार नारायणगढ लगायतका क्षेत्रमा लाइन काटेको थियो । दिनभर लाइन काटिँदा गर्मीका कारण नागरिकले सास्ती पाएका थिए । उक्त दिन भरतपुरको अधिकतम तापक्रम ३८ डिग्री सेल्सियस रहेको थियो ।
तर विद्युतका कर्मचारी लाइन छिटो दिने भन्दापनि दिनभर खसी काटेर जाँडपाटी गर्नमै व्यस्त थिए । असार मसान्तको क्लोजिङ भन्दै पार्टी गरिएको कार्यलय प्रमुख सिंहले बताए ।
कार्यालय समयमा कार्यालयभित्रै रक्सी पार्टी भएको जानकारी पाएर फोटो खिच्न र समाचार संकलनका लागि पुगेका नारायणी अनलाइन पत्रकार कृष्ण आचार्यलाई रक्सीले मातेका कर्मचारीले कुटपिट र दुव्र्यवहार समेत गरेका छन् । उनीहरुले आचार्यसंग रहेका दुईवटा मोवाइल खोसेका छन् भने जाँड पाटीको फुटेज र फोटो डिलिट गरेका छन् ।
कार्यालयभित्र हामी राजा हो भन्दै एक्कासी फोटो र भिडियो किन खिचेको भन्दै आक्रमणमा उत्रिएको पत्रकार आचार्यको भनाइ छ । उनले ७÷८ जना जाँडले मातिएका कर्मचारीले कुटपिट गर्दापनि भागेर ज्यान जोगाउन सफल भएको बताए ।
कार्यालय प्रमुखकै निर्देशनमा कार्यालयको मुख्य गेट नै लगाएर कुटपिट गरिएको आचार्य बताए । उनले भने, ‘कार्यालय प्रमुख सिंहको नेतृत्वमै घटना भएको छ, उनले नै आक्रमण गर्न निर्देशन दिएका हुन् ।’
घटनापश्चात नेपाल पत्रकार महासंघको टोली प्रहरीसहित उक्त स्थानमा पुगेको थियो । तर त्यतिबेला जाँड खाएका सबै कर्मचारी भागेका थिए भने नखाएका केही मात्र कार्यालयमा देखिन्थे ।
उनीहरुले रक्सीका बोतल र खाएका पिलेट नजिकैको झाडीमा फालेको भेटिएको थियो । पत्रकार आचार्यलाई दुव्र्यवहार गरेका ठाँउमा रक्सी र खानेकुरा पोखिएको छ । कार्यालयको दिनभरको सिसिटिभी समेत डिलिट गरिएको छ ।