काठमाडौं / पछिल्लो २४ घण्टामा ३३५ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार दुई हजार ९९६ नमुना परीक्षणमा ३३५ जनामा संक्रमण पुष्टि भएको हो । एक हजार ८८ पीसीआर परीक्षणमा २१६ र एक हजार ९०८ एन्टिजेन परीक्षणमा ११९ गरी ३३५ जनामा संक्रमण पुष्टि भएको हो ।
पछिल्लो २४ घण्टामा कोरोना भाइरस संक्रमणमुक्त हुनेको संख्या ८६ रहेको छ । हाल देशभर कोरोना भाइरसको सक्रिय संक्रमितको संख्या दुई हजार ९७१ रहेको छ । पछिल्लो २४ घण्टामा कोरोना संक्रमणका कारण मृत्यु भएको छैन ।
- ADVERTISEMENT -
चितवनमा सक्रिय संक्रमित ३० जना
यसैबीच चितवनमा कोरोना भाइरस संक्रमण दिनप्रति उकालो लाग्दै गएको छ । पछिल्लो समय दिनहुँ नयाँ संक्रमित देखिन थालेका छन् । चितवनमा हाल कोरोनाका सक्रिय संक्रमितको संख्या ३० पुगेको स्वास्थ्य कार्यालयले जानकारी दिएको छ ।
उनीहरु मध्ये भरतपुर महानगरपालिकाका मात्रै २७ जना रहेका छन् । दुई जना कालिका नगरपालिका तथा एक राप्तीका हुन् । सक्रिय संक्रमित मध्ये २८ जना होम आइसोलेसनमा छन् । अन्य दुई जना भने भरतपुर अस्पतालको आइसोलेसनमा रहेको स्वास्थ्य कार्यालयले जनाएको छ ।
यसैबीच पछिल्लो २४ घण्टामा चार जना नयाँ संक्रमित फेला परेका छन् । २२ जनामा पिसिआर परीक्षण गर्दा चार जनाको रिपोर्ट पोजेटिभ आएको हो ।
