प्राकृतिक विपत्तिबाट बच्न वडाअध्यक्ष रानाभाटको आग्रह

चितवन / भरतपुर महानगरपालिका वडा नं. २ का वडाध्यक्ष मनोज रानाभाटले नारायणी नदीको बाढी तथा पुङ्गी खोलाको भेलबाट बच्न वडावासीहरुलाई आग्रह गरेको छ ।
अध्यक्ष रानाभाटले राहत तथा उद्धारका लागि वडामा व्यवस्थापन टीम तयारी अवस्थामा राखिएको बताए । वडावासीहरुलाई कुनै पनि समस्या परे तत्काल वडा कार्यालयमा खबर गर्न उनले अनुरोध गरेका छन् ।
मौसममा आएको परिवर्तनसँगै अहिले नदीहरुमा पानीको बहाब बढ्दै गएको छ । निरन्तरको वर्षाका कारण नारायणी नदीसँगै अन्य खोलाहरुमा पानीको बहाब बढेको हो ।
नारायणी नदी र पुङ्गी खोला आसपासमा बसोबास गर्ने सबैलाई सुरक्षित स्थानमा बस्न उनले आव्हान गरेका छन् ।
वर्षातको समयमा हुन सक्ने सरुवा रोगको महामारी नियन्त्रणका लागि सबैले पानी उमालेर मात्रै पिउन र टोल टोलमा सरसफाईलाई ध्यानमा राख्दै काम अघि बढाइएको उनले बताए ।
उनले वडाको सुरक्षाका लागि सिसिटिभि जडान तथा शिक्षाको हब निर्माणमा काम गर्ने बताए । यस वडामा तीन वटा सरकारी विद्यालय र निजी गरी १८ वटा विद्यालय रहेका छन् ।
आगामी दिनमा विद्यालयभित्र सिसिक्यामेरा जडानको काम, जेब्रा क्रसिङ निर्माणको कामलाई समेत प्राथमिकता राखिएको उनको भनाइ छ ।