काठमाडौं / देशभर बाढीपहिरोका कारण ज्यान गुमाउनेको संख्या २ सय ५८ पुगेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणकी प्रवक्ता शान्ति महतले बिहीबार दिउँसो २ बजेसम्म देशभर २ सय ५८ जनाको शव फेला परेको बताइन् ।
उनका अनुसार बाढीपहिरोमा परी अझै ९१० जना सम्पर्कविहीन छन् । सबैभन्दा धेरै चितवनमा १०८ जनाको शव फेला परेको छ । नवलपरासी पूर्वमा ६२, धादिङमा २७, गोरखामा २०, नवलपरासी पश्चिममा १५, नुवाकोट र तनहुँमा १२–१२ तथा रसुवामा २ वटा शव फेला परेको महतले बताइन् ।
- ADVERTISEMENT -
सम्पर्कविहीन हुनेमा नेपाल प्रहरीका २८, नेपाली सेनाका ४४, सशस्त्र प्रहरी बलका १३, भन्सार कार्यालयका १५ र अध्यागमन कार्यालयका ४ जना छन् । रसुवाका १६१ जना र नुवाकोटका एक जना नागरिक पनि सम्पर्कविहीन रहेको उनले बताइन् ।
यस्तै बाढीपहिरोका कारण ३५ देशका ५१७ जना विदेशी नागरिक सम्पर्कविहीन रहेको प्राधिकरणको तथ्यांक छ । नेपाल घुम्न आएका तर विदेशमा बसोबास गर्ने १२७ जना नेपाली नागरिक पनि सम्पर्कविहीन रहेको महतले बताइन् ।
‘मानवीय क्षतिको कुरा गर्दा अहिलेसम्म २५८ जनाको शव फेला परेको छ । धादिङमा २७, नुवाकोटमा १२, रसुवामा २, गोर्खामा २०, नवलपरासी पूर्वमा ६२, तनहुँमा १२, चितवनमा १०८ र नवलपरासी पश्चिममा १५ वटा शव फेला परेको छ,’ महतले बताइन् ।
उनका अनुसार खोज तथा उद्धारका लागि नेपालका तीनवटै सुरक्षा निकायबाट ९ हजार २६० जना सुरक्षाकर्मी परिचालन गरिएको छ । नेपाल प्रहरीका ३ हजार ३१८, नेपाली सेनाका ४ हजार २०० र सशस्त्र प्रहरी बलका १ हजार ७४२ जना सुरक्षाकर्मी फिल्डमा खटिएका छन् ।
बिहीबार दिउँसो २ बजेसम्म हेलिकप्टरमार्फत ३५१ जना प्रभावितको उद्धार गरिएको महतले बताइन् । उद्धारका लागि बिहीबार मात्रै ६९ वटा हवाई उडान भएका छन् । उद्धार गरिएकामध्ये ४६ जना विदेशी नागरिक रहेको उनले जानकारी दिइन् ।
‘हामीले आज २ बजेसम्म ३५१ जना प्रभावितहरूलाई हेलिबाट उद्धार गरेका छौँ । आज उद्धारका लागि आज मात्रै ६९ वटा हवाई उडानहरू भएका छन् । विदेशी नागरिकको हकमा ४६ जना विदेशी नागरिकहरू रेस्क्यु गरिएको छ,’ महतले बताइन् ।
प्राधिकरणले प्रभावित क्षेत्रमा खोज तथा उद्धार कार्यलाई निरन्तरता दिइरहेको जनाएको छ ।
