फोनिजले २३ औं स्थापना दिवस मनाउँदै, पहिलो पटक कार्यालय शुभारम्भ

चितवन / जनजाति पत्रकारहरुको छाता संगठन नेपाल आदिवासी जनजाति पत्रकार महासंघ (फोनिज) चितवनले आज (शुक्रबार) २३ औं स्थापना दिवस मनाउने भएको छ । फोनिजले २३ औं स्थापना दिवस सँगसँगै पहिलो पटक आफ्नै कार्यालयको शुभारम्भ गर्न गइरहेको अध्यक्ष रमेश रानामगरले जानकारी दिए ।
उनका अनुसार सो कार्यालय भरतपुर ११ भोजाडस्थित नेपाल आदिवासी जनजाति महासंघ (नेफिन) चितवनले आफ्नै भवनमा उपलब्ध गराएको हो । नेफिनले फोनिजलाई उक्त कार्यालयको लागि कोठा निःशुल्क उपलब्ध गरिदिएको उनले बताए ।
उक्त कार्यालय इच्छाकामना गाउँपालिकाका अध्यक्ष दानबहादुर गुरुङले उद्घाटन गर्ने कार्यक्रम रहेको फोनिज चितवनका उपाध्यक्ष तुलमान गुरुङले जानकारी दिए । उपाध्यक्ष गुरुङले आज (शुक्रबार) बिहान १० बजेबाट सुरु गरिने उक्त कार्यक्रम सबै फोनिजकर्मीलाई उपस्थित हुन आग्रह समेत गरेका छन् ।
उनले स्थापना दिवसकै अवसरमा दुई जना फोनिजकर्मीहरुलाई सम्मान गरिने बताए । फोनिजका निवर्तमान र विगत लामो समयदेखि पत्रकारिता क्षेत्रमा लागेका एक जना गरी दुई जनालाई सम्मान गरिने उनले भने । पछिल्लो समय मिडिया क्षेत्रमा फोनिजको गतिविधि चलायमान भएको आकलन गरिएको छ ।