आठ लाख ठगी गरेको आरोपमा चितवनका रविन्द्र पक्राउ

चितवन / आठ लाख रकम ठगी गरेको अभियोगमा एक जनालाई प्रहरीले पक्राउ गरेको छ । ‘वर्किङ भिसा’ मा अफगानिस्तान पठाईदिन्छु भनी उक्त रकम ठगी गरेको आरोपमा बिहीबार पक्राउ परेका हुन् ।
प्रहरीका अनुसार पक्राउ पर्नेमा चितवन भरतपुर महानगरपालिका–२१ घर भई काठमाडौं बसुन्धरा बस्ने राप्ती प्लेसमेन्ट सर्भिस प्रालीका सञ्चालक ३९ वर्षीय रविन्द्र अधिकारी हुन् ।
मासिक एक लाख रूपैयाँ भन्दा बढी तलब हुने गरी अफगानिस्तानमा सेक्युरिटी गार्डको काममा लगाइदिने प्रलोभनमा पारी पीडितबाट ८ लाख रूपैयाँ लिई उनी सम्पर्कविहीन भएका थिए ।
पीडितहरुको उजुरीको आधारमा काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले काठमाडौं महानगरपालिका–३ बसुन्धराबाट उनलाई पक्राउ गरेको हो । उनलाई थप अनुसन्धान तथा कारवाहीको लागि वैदेशिक रोजगार विभाग बुद्धनगर काठमाडौंमा पठाइएको छ ।