चितवनमा सवारी चालक अनुमति पत्रको लागि सर्वोच्चद्वारा बाटो खुला

चितवन / यातायात व्यवस्था सेवा कार्यालय चितवनलाई सवारी चालक अनुमति पत्र (लाइसेन्स) वितरण गर्नका लागि बाटो खुलेको छ । लाइसेन्स वितरणको लागि प्रयोगात्मक परीक्षास्थल छनोट सम्वन्धमा सर्वोच्च अदालतबाट जारी भएको अन्तरिम आदेशको विरूद्धमा मुख्यमन्त्री तथा मन्त्रिपरिषद्को कार्यालय र यातायात ब्यवस्था कार्यालय भरतपुरले दर्ता गरेको भ्याकेटको पक्षमा फैसला भएको छ ।
यससंगै चितवनबाट सवारी चालक अनुमतिपत्रको लागि प्रयोगात्मक परिक्षास्थल छनोटको बाँकी प्रक्रिया अगाडि बढाउने बाटो खुलेको यातायात ब्यवस्था कार्यालय भरतपुरका सूचना अधिकारी गोविन्द पौडेलले जानकारी दिए । न्यायाधिश ईश्वरकुमार खतिवडा र डा मनोजकुमार शर्माको इजलासले मुख्यमन्त्री कार्यालय र यातायात कार्यालयको माग बमोजिम हुने फैसला सुनाएको हो ।
प्रयोगात्मक परीक्षास्थल छनोटको विरुद्धमा चितवन ड्राइभिङ स्कुलले गएको असार १९ गते सर्वाेच्चमा मुद्धा दायर गरेको थियो । प्रयोगात्मक परीक्षास्थलको लागि सदगुरु र महालक्ष्मी मोटर ड्राइभिङ सेन्टर प्रतिस्पर्धाका लागि छानिएका थिए ।
यी दुई सेन्टरको प्राविधिक मूल्यांकन हुने क्रममा प्रयोगात्मक परीक्षास्थलको छनौटका लागि प्रवेश नपाएको चितवन ड्राइभिङले मुद्धा दर्ता गरेको थियो । अब प्रयोगात्मक परीक्षास्थलको लागि कुनै एक ड्राइभिङ सेन्टर छनोट हुने बित्तिकै लाइसेन्स वितरणको काम सुरु हुने छ ।