अण्डा उत्पादक लेयर्स कुखुरा पालक संघको तदर्थ समिति गठन

चितवन / नेपाल लेयर्स कुखुरा पालक व्यवसायी संघ तदर्थ समिति गठन भएको छ । संघको तदर्थ समितिको अध्यक्षमा विनोद पोखरेललाई चयन गरिएको छ ।
जसमा संघको महासचिवमा शोभाकान्त ढकाल, सचिवमा मदन चिरञ्जीवि पोखरेल, कोषाध्यक्षमा प्रकाश चापागाईलाई छानिएको छ भने सदस्यहरुमा राजेन्द्र लामिछाने, रामलाल भुषाल, ज्योतेन्द्र श्रेष्ठ, गंगा भट्टराई, भरत शर्मा, गोकुलनाथ पौडेल, पिताम्बर सञ्जेल, सञ्जीव खनाल रहेका छन् ।
यस्तै, संरक्षकमा गुणचन्द्र बिष्ट, सल्लाहकारहरुमा सुरेश वैद्य, दीपककुमार प्रधान, शिवाजी राव रहेका छन् ।
कार्यक्रमको अध्यक्षता नेपाल कुखुरा व्यवसायी मञ्चका अध्यक्ष राजेन्द्र लामिछानेले गरेका थिए भने प्रमुख अतिथि गुणचन्द्र बिष्ट रहेका थिए । संघ संस्थाहरु मिलेर पोल्ट्री व्यवसायलाई अगाडि बढाउनु पर्ने उनीहरुको भनाइ थियो ।
तदर्थ समितिका अध्यक्ष पोखरेलले संस्था गठन गर्नुपर्नेको कारण र उद्देश्यमाथि प्रकाश पारेका थिए । उनले पोल्ट्री नीति निर्माणका लागि राज्यसँग पहल गर्न, अण्डाको बजारलाई व्यवस्थित बनाई अण्डाको खपत बढाउन समिति गठन गरिएको जानकारी दिए ।
चितवन लगायत देशैभरका अण्डा उत्पादन गर्ने ठूला व्यवसायिक फर्महरु संगठित भएको हो । नेपालको अण्डा उत्पादनमा ८० प्रतिशत हिस्सा ओगट्ने करिब ४० जना व्यवसायीहरु संगठित भएका हुन् ।
नेपालमा दैनिक ४८ देखि ५० लाख अण्डा उत्पादन हुँदै आएको छ । अण्डा उत्पादन क्षेत्रमा मात्रै रु. ७५ अर्ब लगानी भएको बताइएको छ ।